“Ami nu'udar Grupu Estudantil Munisípiu Lautein hakarak hamriik hodi espresa demokratikamente ami-nia preferénsia ba kandidatura iha eleisaun prezidensiál tuir mai no ami hakarak husu ba Dr. Francisco Guterres ‘Lú Olo’ atuál Prezidente Repúblika atu re-kandidata nia-an ba eleisaun prezidensiál periódu 2022-2027”, deklara Portvoz GEML, Vidalizia De Jesus, iha Jardim 05 de Maio Colmera, kuarta (07/07).
Tanba Prezidente Repúblika (PR), Francisco Guterres ‘Lú Olo’ firme ho nia pozisaun nu'udar aman ba nasaun durante ne’e.
“Ami fiar katak só uniku PR mak firme ho nia pozisaun nu'udar aman nasaun nian hodi hatudu kapasidade lideransa ba povu ne'ebé nia hadomi tebes, tanba Prezidente Lú Olo ema ida ne'ebé hatudu nia konsisténsia no komitmentu iha palku-politika nomós hatudu domin forti ba nia pátria nomós nia povu”; afirma portavoz.
Ho ida-ne'e mak povu Timor-Leste presiza hatene oinsá ezemplu ida-ne'e bele habelar hosi família ida ba família sira seluk.
"PR Francisco mak bele hasa'e dignidade estadu nian hodi hamate abut hun koruptór sira ne'ebé hakarak susu-mohu Povu maubere nia riku-soin iha Timor-Leste, ezemplu mak promulga lei Anti Korrupsaun ne'ebé tinan barak subar hela iha gaveta guvernu anteriór”, dehan nia.
Durante ne’e PR halo tuir de'it konstituisaun RDTL no la hakruuk ba líder politiku ruma hodi ignora pozisaun sira ne’ebé konsagra iha Konstituisaun. (*)