“Ha'u hanoin, kualker sé de'it mak mai, jerasaun foun ka jerasaun tuan, maibé nia iha importante mak iha nasaun ida polítika interna ne'e nia komprende, no externa ne'e komprende di'ak liu, labele mai interna de'it, maibé externa nia la komprende”, dehan Camílio, iha Kampus Faspol, Kaikoli, segunda (05/07).

Tanba atu kandidatu ba prezidente, nia mak figura sentrál, tenke komprende di'ak polítika interna, no polítika externa, tanba ema ne'ebé mak hakarak atu kandidata-an ba PR numímu tenke iha kuñesimentu ne'ebé klean ba polítika interna no externa ninian.

“Tanba prezidente repúplika ninia funsaun ne'e atu asegura rua ne'e dala ida, kuandu rai laran di'ak, kerdijer que rai liur di'ak liu. Maibé, iha ne'e de'it mós problema, iha posibilidade problema mós ba tan iha rai liur”, afirma nia.

Dalabalu ema atu kandidata-an ba PR tenke figura públika, tanba ne’e mak ema sira ne'ebé halo asaun karidade ruma, sempre mosu ema hatene no koñese. Maibé labele derepente mosu hanesan funsionáriu ida hakarak kandidata-an.

“Ha'u hanoin ita lakon ita-nia votu de'it. Tanba ne'e mak ne'e kandidatu sira ne'ebé mak aprezenta ona, pure-zemplu di'ak, maibé ita tenke hamosu sira ne'ebé mak seidauk ne'e, presiza tenke hamosu figura importante sira ne'e para eleisaun ba prezidénsial ne'e kompetetivu oituan, labele ba ronde ida de'it, dehan ema monu namtati hotu ona, ema manán de'it ona”, dehan nia.

Tanba ne’e, husu ba sidadaun hirak ne'ebé atu kandidata-an ba PR hodi kompete iha Eleisaun jerál tinan 2022 tenke haree didi’ak no deside atu sai prezidente ba povu no labele sai fali prezidente ba grupu ka partidu ida.

“Prezidente ba povu iha nasaun ne'e, no nia tenke iha relasaun internasionál ne'ebé mak ha'u hanoin di'ak liu. Tanba Timor-Leste la'ós mesak de'it, maibé Timor-Leste mós halo kooperasaun ho nasaun sira seluk iha liur”, dehan nia.

Entretantu, tuir kalendáriu husi Sekretáriadu Tékniku Administrasaun Eleitorál (STAE) no Komisaun Nasionál ba Eleisaun (CNE) katak, prezidensiál sie hala’o iha tinan 2022. (*)