Sekretária Meza Parlamentu Nasionál, Deputada Lídia Norberta hatete, planu aprezentasaun ne'e hahú iha loron 1 fulan-jullu, maibé meza haree katak bankada balun dadauk seidauk aprezenta kandidatu.
“Tanba ne'e mak desizaun meza, deside atu estende tan prazu ba kandidatura nian to'o dia 6 de jullu, semana oin”, esplika nia iha Parlamentu Nasionál, kinta (01/70).
Husi prosesu ne'e, bankada Frente Mudansa ho bankada CNRT, deside aprezenta ona sira-nia kandidatu, maibé bankada sira seluk hanesan FRETILIN, KHUNTO, PLP, PD, UDT, PUDD seidauk aprezenta.
“Maibe (bankada) balun adianta ona katak iha tempu badak sira mós sei aprezenta kandidatu, hanesan bankada FRETILIN, KHUNTO, nomós iha posibilidade PD mós husu atu aprezenta kandidatu”, hatete nia.
Maske bankada sira avansa kada sira-nia kandidatura maibé atu determina kandidatura depende fali ba lei.
Iha fatin hanesan Xefe bankada Congresso Nacional de Reconstrução de Timor (CNRT), Duarte Nunes, deklara sira aprezenta duni lista ba meza PN atu kandidata ba komisiáriu CNE.
“Ami hatama ona ema na’in-rua mais ami depois iha hanoin atu hadi’a para ida de'it, tanba ida de'it mós ami seidauk iha serteza ami atu hetan”, dehan nia iha PN, sesta (02/07).
Bankada CNRT mós lahatene prosesu kona-ba kandidatura tanba iha tinan uluk kuandu lei haruka parlamentu buka ema ne'e sempre sistema profisionál, maibé agora prosesu ne'e karik bele muda ona ba votasaun.
"Se profisional, ami hetan ida, Fretilin ida, PLP ida karik, tanba ne'e ita kuandu dehan profisionál, mais prontu ita hein de'it, bainhira mak iha desizaun ikus”, dehan nia. (*)