“Komisaun A finaliza ona redasaun finál kona-ba lei tolu kona-ba alterasaun ba lei órgaun administrasaun eleitorál, resensiamentu eleitorál no eleitorál ba Prezidente Repúblika. Ohin kedas Komisaun A haruka ba Prezidente Parlamentu Nasionál atubele konsidera. Aban ka bainrua, haruka ba Prezidente Repúblika halo promulgasaun,” informa Prezidente Komisaun A, Deputadu Joaquim dos Santos iha uma fukun, kinta (01/07).
Enkuantu Parlamentu Nasionál (PN) iha loron 28 juñu 2021 deside altera pakote lei eleitorál tolu hanesan lei eleitorál ba Prezidente Repúblika, lei órgaun administrasaun eleitorál, no lei resensiamentu eleitorál iha finál globál ho votu afavor 62.
Husi artigu hirak ne'ebé hetan alterasaun iha lei Eleitoral Prezidente Republika, hamutuk 11 hanesan 19, 31, 32, 36, 38, 39, 40, 41, 44, 45 no 68.
Aleinde, alterasaun ba proposta lei órgaun administrasaun eleitorál ne'e, altera ona artigu 8, 12, 14 no 15.
Nomós lei resensiamentu eleitorál ne'e konsege altera artigu hamutuk 13 hanesan artigu 12, 13, 15, 16, 17, 22, 23, 26, 29, 30, 34, 36 no 51.
Enkuantu, politika governu hodi husu halo alterasaun ba lei eleitorál tolu ne’e, la’ós substansiál maibé halo de’it emendasaun.
Tanba bazeia ba introdusaun foun iha lei eleitorál ba Prezidente Repúblika hodi estabelese sentru votasaun paralelu atu oinsá fasilita sidadaun sira partisipa eleisaun Prezidente Republika iha tinan 2022. (*)