Maibé Bankada Partidu Demokrátika (PD) husu governu atu implementasaun ba medida tenke respeita diretu povu nian.
Desizaun atu renova Estadu Emerjénsia ba dala-15, bazeia ba alinea G, artigu 85 husi konstituisaun Repúblika, ne’ebé sei hahú implementa iha loron 2 to'o 31 fulan-jullu tinan 2021.
Tanba ne'e, rezultadu aprovasaun ba Pedidu husi Prezidente Repúblika (PR), Francisco Guteres ‘Lú Olo’ afavor 39, no abstensaun 20 inklui deputadu 6 aujénsia iha plenária.
Husi ezekusaun estadu emerjénsia ne'e, sei suspende diretu balun liliu atividade sidadaun, no taka fronteira marítima, terestre no fronteira aeru.
“Husu ba governu atu ezekuta planu no orsamentu ho lolos, implementa medida de intervensaun hodi respeita direitu povu nian, dignifika estadu de direitu demokratiku no kaer metin lei no ordem”, dehan Deputadu bankada PD, Adriano do Nacimento iha Parlamentu Nasional (PN), kuarta (30/06).
Husu mós ba governu atu responde nesesidade povu no nasaun nia, tuir planu rekoperasaun ekonomiku, fó insentivu ba frontline sira tuir sira-nia direitu no dever ho justu no transparan.
“Timoroan balu kestiona kona-ba efetividade vasina astraZeneca no Sinovac, hodi aprezenta dadus mortal no ema moras depois simu vasina, polítika rai seluk hodi vasina ema ho idade 60 ba leten, mas iha Timor-Leste hola desizaun atu vasina ho ema hosi idade 18 ba leten”, dehan nia.
Maibé Partidu Demokrátiku fó apoiu nafatin ba Prezidente Repúblika no governu atu halo extensaun ba estadu emerjénsia.
Entretantu Deputada Bankada PLP, Maria Angelina Sarmento, kontinua fó apoiu governu atu implementa estadu emerjénsia nu’udar opsaun ida hodi prevene risku kontájiu covid-19 iha Timor-Leste.
Nune’e mós Ministru Prezidensia Konselhu Ministru (MPKM), Fidélis Leite Magalhães hatete, kestaun no preokupasun ne'ebé deputadu sira foti iha plenária governu prontu atu hatan, maibé depende ba desizaun PN atu konvoka debate ho governu ba asuntu espesifiku.
“Asuntu sira barak mak ohin (30/6) foti ne'e, barak liu ho natureza hanesan rekomendasaun e governu anota hotu, iha debate filafila, kona-ba asuntu kada ida, ne'ebé iha tempu oin mai mak parlamentu hanoin presiza atu debate halo klean tan, kabe ba prezidente PN no bankada sira atu konvoka fali governu ba asuntu espesifiku sira ne'e”,dehan nia. (*)