Esforsu ida ne’ebé SEPFOPE halo mak lansa tiha ona sentru formasaun profisional ida iha Rejiaun Administrativu Espesial Oe – Kusi Ambeno (RAEOA) hodi prepara Ambeno oan sira atu bele servisu ba iha mega projetu Zona Espesial ba Ekonómia Sosial no Merkadu (ZEESM) liliu prepara hela rekursu umanu iha área ospitalidade hodi servisu iha aeroportu Rota Sâdalo Oe – Kusi Ambeno ne’ebé nia konstrusaun fizikamentu luxu no di’ak liu aeroportu internasional Nicolau Lobato, Comoro, Dili, maibé aeroportu ne’e hela iha silensiu nia laran, tanba úniku aviaun ki’ik ZEESM mak uja.
“SEPFOPE loke tiha ona sentru formasaun ida iha Ambeno, no iha ona joven lubuk ida mak hakarak tuir formasaun iha sentru ne’e iha área oioin inklui área ospitalidade hodi prepara sira ba servisu iha aeroportu Ambeno nian,” hatete SEPFOPE, Julio da Silva ba Temo Timor iha Parlamentu Nasionál, Dili foin lalais.
Governante hosi Partidu KHUNTO ne’e hatutan, la’ós de’it prepara rekursu umanu ba servisu iha aeroportu Ambeno, maibé prepara mós ba mega projetu sira iha tasi mane.
“Agora ita sei hein hela lei laboral ne’e aprova tiha mak ita bele halo buat barak,” nia esplika.
Rezultadu votus ba Lei Regime Laboral no Mingratoriu Espesial Aplikavél ba Projetu Bayu Undan no 7/V iha votasaun jeneralidade iha loron Kinta (18/07) hetan votu afavor 41, kontra 23, abstensaun zero, maibé iha votasaun espesialidade ne’ebé hala’o iha loron Sesta (19/07) hetan votus afavor 9, kontra 4.
Prezidente Komisaun C ne’ebé trata assuntu Finansas Públika, deputada Fernanda Lay hosi bankada AMP (CNRT) esplika katak, alterasaun Lei Regime Laboral no Mingratoriu Espesial Aplikavél ba Projetu Bayu Undan no 7/V importante tebes ba traballador Timoroan sira hodi bele hetan protesaun di’ak liutan.