Proposta-alterasaun datoluk ba lei númeru 5/2006, 28 dezembru, kona-ba órgaun administrasaun eleitorál no proposta-alterasaun dahuluk ba lei númeru 6/2016, 25 maiu, kona-ba lei resensiamentu eleitorál inklui proposta alterasaun daneen ba lei 7/2006, 28 dezembru, kona-ba lei eleitorál ba prezidente-repúblika.

Hafoin halo aprovasaun, Prezidente Parlamentu Nasionál (PPN) Aniceto Guteres hatete, nia parte fó agradese boot ba komisaun A trata asuntu Justisa no Konstituisionál, ne'ebé halo esforsu boot, aprova desde inisiu, halo apresisaun no hato'o relatóriu pareser ba espesialidade nune'e iha loron 28 fulan-juñu  konsege finaliza ona aprovasaun finál global.

“Lei tolu, aprovasaun final global hotu ona, nune'e ita-nia ajenda ba sensaun ohin (28/6) ita termina iha ne'e”, dehan nia iha plenária PN, segunda (28/06).

Aleinde ne’e agradese mós ba parte governu ne'ebé inisia proposta lei tolu ne'e hodi aprezenta mai Parlamentu Nasionál hodi halo alterasaun.

Haree ba alterasaun Lei Resensiamentu Eleitorál, Governu propoin altera artigu hamutuk 13 hahú hosi artigu 12, 13, 15, 16, 17, 22, 23, 26, 29, 30, 34, 36 no 51 hosi lei resensiamentu eleitorál númeru 6/2016, 25 maiu.

Iha proposta-alterasaun ba lei órgaun administrasaun eleitorál komposta hosi alterasaun hamutuk artigu lima (5), komposta hosi artigu 1 (objetu) ne’ebé konsta iha alterasaun dahuluk ba lei númeru 5/2006, 28 dezembru.

Nune’e mós alterasaun ba Lei Eleisaun Prezidente Repúblika (PR), hodi adekua ba situasaun atuál, iha kontestu pandemia COVID-19 nian, no reforsu ba kapasitasaun, ba resposta ne’ebé di’ak liuba nesesidade sidadaun sira-nian. (*)