Tempotimor (Dili) - Komisaun de Pesquisa e Elaboração do Livru da Luta Mulher de Timor hamutuk ho Organização Popular Mulher Timor (OPMT) sei lansa livru ida ho nia títulu ‘Buibere Hamriik Ukun Rasin Aan’.
"Ami hasoru ona Prezidente Repúblika (PR) hodi ko'alia kona-ba livru feto Timor nian ne'ebé ho títulu Buibere Hamriik Ukun Rasik Aan," hatete Sekretáriu Jerál OPMT (em ezersisiu) Florentina da Conceição M. M. Smith iha Palásiu Prezidensial Bairru-Pite, Sesta (19/07/2019).
Nia dehan, durante hakerek livru ne'e gasta tempu naruk atu bele finaliza."Iha prosesu naruk ne'ebé mak durante ne'e ami hala'o, hodi hakerek livru ne'e. Ne'ebé, ami mós hetan apoiu tomak husi lideransa nasional, hanesan Señor Xanana Gusmão, Sr. Dr. Ramos Horta, Dr. Mari Alkatiri, atuál PR Francisco Guterres Lú-Olo no atuál Primeiru Ministru Taur Matan Ruak ne'ebé konsege to'o ona iha faze final,” dehan Smith.
Nia dehan, livru ne'e atu lansa komisaun hamutuk ho OPMT hakarak hala'o lansamentu iha loron nasionál Timor-Leste nian.
"Ami husi jerasaun 74 no 75 hakarak husik hela memoria ne'ebé di'ak ba istória feto Timor nian. Livru ida ne'e, nia konteudu mak partisipasaun feto tomak hahú husi faze rezistensia hanesan frente klandistina, frente armada no frente diplomasia. Tempu mós to'o ona para ami husik hela memoria ne'e ba feto foin sa'e sira," tenik Florentina.
