Print this page

Governu Deskorda Públiku Deskonfia PAM Maioria Fretilin

Vise Ministru Administrasaun Estatal (MAE), Lino de Jesus Torrezăo. Vise Ministru Administrasaun Estatal (MAE), Lino de Jesus Torrezăo. Foto Suplay

Tempotimor (Dili)-Governu liuhusi Vise Ministru Administrasaun Estatal (MAE), Lino de Jesus Torrezăo, deskorda (kontra) opiniaun sira husi públiku ne'ebé durante lansa hodi deskonfia prosesu selesaun ba kandidatu Prezidente Autoridade Munisipál (PAM) no Administradór Munisípiu maioria ema husi militante no kuadru partidu Frente Revolusionária Timor-Leste Independente (Fretilin).

"Agora, ha'u atu hatete buat ida mak ne'e, ita polítiku sira ne'e, barak liu mak polítika administrasaun públika ne'e maka'as liu. Agora ha’u hatete dehan, sé ema ne'ebé tuir selesaun pur-méritu, ema ne'e mai mak CNRT, PLP, KHUNTO de'it, ou Fretilin de'it, sira mai hotu. Sé sira-nia valór ne'e la di'ak, ita atu foti nia tau loos de'it ka?. Ita tau ba ida ne'e, purke nia valór di’ak ne'e. Ida ne'e ita atu halo nusá”, esklarese Lino Torrezăo, iha salaun Lalini Larigutu-CNE, Kolmera, tersa (22/06).

Ba selesaun sira ne'ebé durante ekipa juri hala'o iha MAE nian laran, haree tuir méritu husi kada individu ka kandidatu sira-nia kapasidade pesoál.

"Ida ne'e mak ema dehan selesaun pur méritu ba ezame. Ezame ó hetan valór di'ak mak ba ka. Agora, barak politiza, kuandu la hetan ona politiza dehan, mesak Fretilin nian mak ba, sala. Tanba Fretilin ne'e ema barak mak tuir ne'e, e PLP mós mai ema barak mak tuir. Ita la tuir ona, sei ko’alia. Depois tuir tiha mak la liu mós, ko’alia nafatin. Ida ne'e mak laloos”, afirma nia.

Kona-ba progresu selesaun ba kandidatu Prezidente Autoridade Munisipiu (PMA) no Administradór Munisípiu sira, atinje ona pursentu 98 (90%), tanba sei hela munisípiu Manufahe nian ne'ebé oras ne'e sei pendente hela iha Konsellu Ministru (KM).

Maibé ba PAM Dili nian, sira hala'o konsellu konsultivu no hein de'it MAE atu aprezenta ba reuniaun KM.

“Agora, fatin 4 ninian, Bobonaru, Ermera, Manatutu ho Likisá, ne'e delibera tiha ona e administradór sira mós ezonera tiha ona, sai tiha jornal da repúblika ona. Agora, sé mak interinu iha ne’ebá, hein toma-de-pose”, informa nia. (*)

 

 

Rate this item
(1 Vote)
Last modified on Wednesday, 23 June 2021 08:38
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items