“Iha situasaun difísil ida ne'e Covid-19, governu husu ita-boot sira-nia partisipasaun maka’as liután, liliu atu ajuda governu hodi halo kampaña, nune'e ita-nia sidadaun sira hothotu bele iha konsiénsia hodi tuir vasina, tanba ita-nia luta agora mak ida ne'e”, dehan SEKomS, Merício Dos Reis Akara hafoin partisipa seremónia aniversáriu CVTL ba dala-XXI iha Formoza, tersa (22/06).
Governu konsege implementa Estadu Emerjénsia, serka sanitária hothotu, maibé iha failansu tékniku balun, vírus ne'e iha Timor-Leste tama ona transmisaun lokál no agora transmisaun komunitária.
“Aproveta oportunidade ida ne'e, husu Crus Vermelha ninia kontribuisaun maka’as liután hodi enkoraja sidadaun hotu, hodi bele partesipa iha vasinasaun no espera to'o iha fulan-novembru ou fin do ano ida ne'e, ita bele relata oituan pursentu 70 ka pursentu 80 populasaun ne'ebé hetan ona vasinasaun ida ne'e”, afirma nia.
Iha fatin hanesan, Prezidente Cruz Vermelha de Timor-Leste (CVTL), Madalena Hanjam hatete, iha situasaun Covid-19 sira mós apoiu rekruta pesoal saúde tanba ospitál sira presiza tebes.
"Agora Covid-19 ospitál presiza ema atus-haat atubele halo protesaun shif maibé ida ne'e kuandu la to'o, Cruz Vermelha tenke servisu apoiu, ne'e duni ami rekruta médiku, efermeiru, aliadu, ho vuluntáriu ejiñeiru sira balun ne'ebé mak iha tékniku badain sira atu ajuda hadi’a odamatan no sentina”, dehan nia. (*)