Tempotimor (Dili)-Xefe Bankada Kmanek Haburas Unidade Nasionál Timor Oan (KHUNTO), Olinda Guteres, ejize ba Sekretáriu Estadu Teras Propriedade (SETP) no Prokuradór Jerál Repúblika (PJR) atu loke matan ba disputa rai ne'ebé sai problema ba komunidade iha Suku Hera, Postu Administrativu Cristo Rei, Munisípiu Dili.

“Sekretariu Teras Propriedade, karreta hun-ha iha kotuk, mais to'o agora seidauk halo buat ida. Povu agora iha Hera ne'eba hán malu mate, kona-ba rai ne'ebe, balun okupa rai estadu nian, balun hadau malu nia avo ninian, balun dehan ida ne'e tiun ninian, eransa buat hotu iha ne'eba”, dehan nia iha plenária Parlamentu Nasionál (PN), tersa (22/06).

KHUNTO mós fó ona orientasaun ba pesoál balun hodi halo keixa ba Prokuradór Jerál Repúblika (PJR) kona-ba komunidade balun ne'ebé faan rai estadu ninian.

Tanba iha komunidade balun laiha konsiénsia hodi fa'an rai estadu nian ne'ebé baliza ho deputadu ninia rezidénsia.

"Nia fa’an rai estadu ninian, ha’u haruka ona ema hatama karta ba Prokuradór Jerál maibé tau di'ak tiha fali”, afirma nia.

Loloos, estadu tenke agradese, ba povu ki’ik ida, ai-leba ida hatama keixa kontra sidadaun ne'ebé fa'an ilegalmente rai estadu nia

"Ba mak hanesan ne'e, ha’u hanoin la dun loos ona, hela besik tinan ida ho balun tenke halo netik buat ruma, teras propriedade so foti de'it naran dehan teras propriedade, Ministru Justisa foti de'it Ministru Justisa, seidauk halo buat ida, dexpaisu señor Primeiru Ministru nian tun mai, sira tau tiha gaveta la intrese”, deklara Olinda. (*)