Inspetór Gabinete Inspensaun no Auditória, Orlando da Conseição hatete, servisu ne’e konsentra de’it ba índise sira ne’ebé identifika iha relatóriu atividade anual 2020 no relatóriu atividade trimestrál, husi fulan-janeiru-marsu 2021, iha RTTL.ep nian.

"Atividade inpensaun ida ne’e sei hala’o durante loron 30 nia laran, hahú hosi loron 21 fulan-juñu to’o loron 21 fulan-Jullu tinan 2021 nian”, dehan nia hafoin remata audensia ho Prezidente Administrasaun Konsellu RTéL.ep José António Belo ‘Taraleu’ iha Kaikoli, segunda (21/06).

Gabinete Inspensaun sei verifika mós lejitimidade, legalidade no regularidade hosi aktu no faktu, prosedimentu administrativu, dezempeñu rekursu umanu nian, funsionamentu estrutura organizasionál no utilizasaun sasán patrimonial no operasional RTTL.ep nian, nune’e propoin medida koretiva sira hodi adota.

Iha fatin hanesan Prezidente Konsellu Administrasaun RTTL.ep, José António Belo ‘Taraleu’, komprometidu atu kolabora ho Gabinete Inspesaun no Auditória tanba konsidera atividade inspesaun no auditória mai RTTL.ep, ne'e importante tebes.

Tanba ne'e RTTL.ep sei kontinua nakloke hodi disponibiliza informasaun ka dokumentu saída de’it ne’ebé presiza hosi servisu inspesaun no auditória nian.

Enkuantu Gabinete Inspensaun no Auditória iha Ministériu Asuntu Parlamentár no Komunikasaun Sosiál hala'o atividade bazeia ba lei organika Ministériu nian ne’ebé fó responsabilidade ba Gabinete atu halo inspesaun no fiskalizasaun ba funsionamentu hosi orgaun no servisu sira ne’ebé tutela ba MAPKOMS.

Haree ba ninia legalidade no estatutu RTTL.ep ne’ebé aprova hosi Dekretu-Lei Nu.42/2008, hateten katak, kompete ba ministériu ne’ebé RTTL,ep, tutela ba hodi asesu infomasaun nesesaria sira no akompaña servisu RTTL,ep nian, no determina mós inspesaun no auditória ba funsionamentu RTTL,ep nian. (*)