Deputadu bankada Partidu Libertasaun Popular (PLP), Abel Pires, konsidera pozisaun Timor-Leste hodi abstein situasaun iha Mianmar hatudu momos katak, Timor-Leste haluhan ninia istória luta ukun rasi-an.

“Parte ida ita haluhan ita-nia istória katak ita-nia ukun rasik-an ne'e ita hetan, parte ida mak husi solidaridade husi nasaun internasionál sira, inklui povu ne'ebé agora dadauk terus hela iha Mianmar ne'eba”, dehan Abel iha plenária PN, tersa (22/06).

Tanba ne'e, PLP fó apoiu ba deklarasaun deputadu sira ne'ebé dehan, di'ak liu Timor-Leste lalika tama ona ASEAN.

Tanba prosesu ida ne'e halo Timor-Letse atu haluha fali ninia istória. Pior liu ba hamaus fali rejime ida ne'ebé mak hadau de'it poder no uza tan kilat oho nia povu.

"Agora ita atu nonok de'it, ne'e lalos”, deklara nia.

Deputada Xefe bankada KHUNTO, Olinda Guteres hatete, maske nia parte la dun hatene legalidade ida ne'e maibe nia parte aseita ho saida mak deputadu sira ko’alia liga ho pozisaun Timor-Leste fó abstensaun ba situasaun Mianmar.

Nue’e mós Xefe bankada FRETILIN, Francisco Miranda Branco hatete, pozisun ne'ebé Timor-Leste fó ba situasaun Mianmar, hatudu momos Timor-Leste fila kotuk ba ratifikasaun, akordu, konvensaun internasionál sira ne'ebé liga ho diretu umanu.

“Ita fila kotuk hotu ba ida ne'e, tanba de'it ho intensaun polítika Timor-Leste atu intergra ba iha ASEAN, lahatene responsavel ba Ministériu ida ne'e konsulta sè, para hasai desizaun ida ne'ebé pozisaun estadu Timor-Leste nian”, dehan nia.

Aliende ne’e, Vise Xefe Bankada CNRT, Patrocino Fernandes dos Reis hatete, nia parte kondena pozisaun Timor-Leste ne'ebé fó absteinsaun ba situasaun iha Mianmar.

RDTL nu’udar estadu ne'ebé defende diretu demokrátiku, maibé fó fali votu abstensaun ba violasaun diretu umanu iha nasaun ida ne'ebé oho ema barak.

“Ha’u nu’udar reprezentante povu, triste bainhira Timor-Leste halo ninia votu abstensaun ba situasaun iha Mianmar”, hatete nia.

Bankada CNRT triste Bainhira haree pozisaun Timor-Leste nian tanba relfeta tebes ba situasuan 18-19 maiu 2020 ninian ne'ebé akontese iha Parlamentu Nasionál.

"Ne'ebé husu governu ninia pozisaun lolos, esklarese tanba sá, pozisaun vota abstensaun ba situasaun iha Mianmar”, dehan nia. (*)