Tempotimor (Dili)-Ministru Asuntu Parlamentár no Komunikasaun Sosial (MAPKomS), Francisco Martins Jerónimo husu ba profesór sira atu prepara-an hodi hein informasaun ba vasina.
"Ha’u hanoin Xefe aldeia sira iha kraik hatene ona, hothotu hatene informasaun. Ne'ebé ha'u husu ba profesór sira atu akompaña informasaun sira ne'e, bainhira ba vasina, ne'e ba vasina”, dehan Ministru Francisco Jerónimo iha plenária Parlamentu Nasionál (PN), segunda (21/06).
Husi kazu covid-19 ne'ebé Timor-Leste enfrente mak governu esforsu distribui ona vasinasaun, ne'ebé la'o namanas hela iha teritóriu Timor-Laran tomak, nomós iha Oekusi, iha loron segunda (21/06) hahú simu vasina.
"En-relasaun ho profesór sira, ha’u hanoin deputadu foti kestaun loos, mais ha’u mós husu profesór sira ne'e hela iha ne’ebé, hela iha rai liur ga hela iha Timór. Se iha Timór, ohin loron vasina la'o namanas, sira lahatene fatin ba vasina, ne'e mós preokupadu”, afirma nia.
Tanba, governu mobiliza ona xefe suku no aldeia sira, atu organiza sira-nia populasaun atu simu vasina ba prevensaun covid-19.
Maibé la taka dalan mós ba profesór sira atu partisipa simu vasina iha aldeia no suku sira ne'ebe implementa vasina.
Bele mós hakat ba Universidade Nasional Timor-Lorosa'e (UNTL) no Sekretáriu Estadu, Juventude Desportu (SEJD) tanba dadauk implementa hela vasinasaun sinovac ne’ebé mak espesial ba profesór no dosente inklui ba estudante sira atubele asesu. (*)
