Nune’e, deputadu husi Bankada Partidu Demokratiku (PD) hein hela hodi vota ba alterasaun lei pensaun vitalisia iha Parlamentu Nasionál.

Deputada PLP, Maria Angelina Sarmento hatete, rejime juridiku kona-ba kontribuisaun iha seguransa sosiál ne'e hanesan jestu liu, no di'ak liu implementasaun lei pensaun vitalísia.

“Kona-bá kontribuisaun iha seguransa sosiál, ne'e buat di'ak ida, ne'e hanesan (simpanan ba masa tua), e ida ne'e ba ami jetu liu, di'ak liu, la hamosu diskriminasaun ba klase sosiál, iha Timor-Leste, do que ita kontinua implementa lei pensaun vitalísia”, deklara Maria Angelina iha PN, kinta (17/06).

Tanba, lei pensaun vitalísia, dala barak hetan krítika maka’as husi veteranu sira, tanba veteranu sira funu durante tinan 24, estadu la fó osan, maibé sira ne’ebé hala'o kna’ar tinan lima de'it hetan pensaun vitalísia durante moris tomak.

“Tanba ne'e mak PLP ninia hare ne'e, aposta liuba rejime juridiku seguransa sosiál ne’ebé hahú la'o ona, e neneik ita bele uza ida ne'e”, hatete nia.

Iha nasaun balun, uza lei pensaun vitalísia ba eis titular sira, maibé ninia persentajen menus, hanesan iha Timor-Leste, hafoin halo alterasaun lei pensaun vitalisia, tanba antes ne’e iha pursentu 100 husi saláriu deputadu ativu. Maibé iha ona mudansa ne’ebé hatun ba pursentu 60.

Bainhira lei pensaun vitalísia laiha alterasaun presiza hatun persentajen atu labele fó diskriminasaun.

“Hanesan ami sira ne'e laiha problema, halakon tiha lei pensaun vitalísia mós laiha buat ida, Mais ita hanoin fali ba eis deputadu sira ne’ebé mak purzemplu sira ne'e uluk hanesan veteranu, sira laiha kualifikasaun, laiha ona skill atu bele kompete iha kampu traballu”, dehan nia.

Iha fatin hanesan deputadu bankada Partidu Demokrátiku (PD), António da Conseição, hatete sira nia parte hein hela proposta alterasaun lei pensaun vitalisia diskute no votasaun.

Tanba PD laiha kompromísiu ba proposta alterasaun Pensaun Vitalísia, maibé tama ona iha PN, PD prontu vota.

“Ne'e PD nia kampaña la ko’alia ida, Fretilin nia kampaña ami la ko’alia, e se mak ko’alia ne'e partidu PLP, husu fali de'it ba sira, sira-nia pozisaun, lei seidauk tama. Se tama iha ne'e, ami vota”, hatete nia. (*)