Prezidente Parlamentu Nasionál (PN), deputadu Aniceto Longuinhos Guteres Lopes hatete, imunidade ba deputadu CNRT seidauk halo, tanba kazu ne'e foin tama iha prosesu investigasaun.

Bainhira rezultadu akuzasaun Ministeriu Públiku (MP) aprezenta ona ba tribunál mak foin PN halo levantamentu imunidade ba deputadu sira.

“Agora keixa ida ne'e mak, Ministériu Públiku komesa notifika ona sira (deputadu). Agora investigasaun seidauk, imunidade, wainhira to'o ona akuzasaun, sei ita atu lori ona ba tribunál, ne'e mak foin hasai karik, maibé depende ba pedidu husi tribunál nian”, esplika Anicento iha Parlamentu Nasionál (PN), sesta (18/06).

Enkuantu kexia ne'e Parlamentu Nasionál aprezenta ba Ministériu Públiku iha loron 19 fulan-maiu tinan 2020.

“Desde iha primeiru dia 19 maiu 2020, loron ne'e kedas ami hato'o ona keixa, ne'e la'ós foin mak ami hatama keixa”, hatete Aniceto.

Antes ne’e Deputada bankada CNRT, Carmelita Caetano Monis deklara, deputadu hamutuk na’in-8 mak konsege simu ona karta notifikasaun husi Ministériu Públiku.

“Sim deputadu balun husi CNRT nian simu ona notifikasaun iha semana kotuk kinta-feira (10/06) hamutuk deputadu na’in-8, ne’ebé simu notifikasaun kona-ba akontesimentu iha dia 18 e 19 maiu 2020”, informa iha PN, tersa (15/06).

Desizaun Ministeriu Públiku hodi notifika deputadu na’in-8 husi bankada CNRT ne'e bazeia ba keixa husi deputadu bankada apoiu governu ne'ebé mak submete ba MP hodi kondena asaun deputadu CNRT sira-nian hodi halo perturbasaun ba orden públika iha loron 19 fulan maiu.

Enkuantu iha loron 18 fulan-maiu tinan 2020, deputadu CNRT halo perturbasaun hodi kontra prosesu eleisaun ba Prezidente PN foun ne’ebé lidera husi Vise Prezidente, Maria Angelina Sarmento, tanba konsidera eleisaun ne'e la tuir nia funsionamentu normál. (*)