“Lansamentu AstraZeneca ne'e iha oin rua, doze dahuluk ba idozu sira, no doze daruak ba ita-nia maluk sira ne'ebé serbisu iha liña frente hodi kompleta sira-nia vasina, ne'ebé antes ne'e sira simu ona doze dahuluk”, dehan Ministru Francisco Jerónimo iha Postu Administrativu Laleia, kurta(17/06).
Vasinasaun ne'e importante tebes tanba bele hasa'e imunidade komunidade nian, hodi prevene infesaun moras kontajioza.
Iha oportunidade ne’e sensibiliza nafatin informasaun kona-ba importánsia husi prevensaun moras kontajioza ne'e ba komunidade sira.
“Sensibilizasaun ne'e atu konsensializa no enkoraja komunidade atu simu vasinasaun hodi proteje an husi vírus ne'ebé sai ona pandemia globál ne'e”, esplika Ministru Francisco.
Iha fatin hanesan,Administradór munisípiu Manatutu, Fernando Junior da Silva, enkoraja komúnidade Postu Laleia atu simu vasinasaun hodi bele prevene-an husi moras Covid-19.
“Ha'u husu ba inan aman sira atu labele rona buat oioin kona-ba vasina ne'e, tanba vasina ne'e di'ak no seguru, hodi proteje ita-nia família no ita-nia an rasik”, hatete nia.
Entretantu iha lansamentu ne'e partisipa husi, Diretóra Jerál Prestasaun Serbisu Saúde, Diretór Nasionál Diseminasaun Informasaun, Reprezentante UNICEF iha Timor-Leste, Administradór Postu Laleia, Diretór Serbisu Saúde Munisípiu Manatutu, Komandante Polísia Eskuadra Laleia, Komunidade Reliziozu, Inklui Komúnidade Laleia. (*)