Apoiu ne’ebé fó ba Ministériu Interior (MI) liliu Servisu Imigrasaun hodi halo kontrolu liuhusi eletrónikamente ba pasajeirus sira ne’ebé tama no sai liuhusi postu integradu imigrasaun ha teritóriu nasionál.

“Sistema ohin (17/06) ne'e, sistema ida naran MIDAS. Ne'e sira IOM nian ne'ebé mak estabelese mós iha nasaun 25, agora dadauk ita servisu hamutuk ho sira nune'e bele estabelese iha Timor-Leste atu mellora ita-nia servisu imigrasaun”, informa Vise Ministru Interior (MI), António Armindo iha Palásiu Governu, kinta (17/06).

Tuir perspetiva governu nian katak, sistema MIDAS mak sistema eletrónika ida ne'ebé integradu tebes, no bele fasilita ekipa sira halo servisu kontrolu iha postu Imigrasaun sira ne'ebé instala ona.

“Ita hothotu hatene katak, agora ne'e tenke dijitaliza. Purtantu, sistema ida ne'e ajuda ita atubele halo servisu hothotu ho lalais, mais efisiénsia, hothotu dijitaliza”, afirma nia.

Maibé mekanizmu implementasaun, iha loron kuarta (23/06) sei aprezenta ba Konsellu Ministru (KM) hodi deside no halo aprovasaun finál.

Apoiu orsamentu ba sistema MIDAS ne'e rasik, hamutuk US$1,5 milhões mai husi governu Austrália liuhusi nia embaixada iha Timor-Leste.

Nune’e iha fulan-setembru tinan 2021, sei hahú ona implementa projetu ne'e iha postu integradu sira Imigrasaun nian iha TL.

Entretantu, sistama MIDAS ida ne'e inísia, bazeia ba komprimísiu PM Taur nian ne'ebé kompromete katak, iha nia mandatu tenke sistema servisu sira iha imigrasaun nia laran, hodi nune'e bele evita matérial drogra sira tama mai rai laran.

Sistema MIDAS ne’e, Cecilia Mcintosh nomós Jacinto Amaral, nu’udar Senior project assistant IOM mak aprejenta ba Primeiru Ministru, Taur Matan Ruak, iha Palásiu Governu, kinta (17/06) hetan akompaña husi Vise Ministru Interior (MI), António Armindo. (*)