Konsellu Ministrus aprova ona projetu Rezolusaun Governu nian ne’ebé estabelese Komisaun Interministeriál ba Reajustamentu husi Planu Estratéjiku Dezenvolvimentu (PED) tinan 2011-2030, ne'ebé aprezenta husi Vise Primeiru Ministru no Ministru Planu Ordenamentu, José Maria dos Reis iha Konselhu Ministru kuarta (16/6).

“Liu tiha ona tinan sanulu ba implementasaun PED tinan 2011-2030 nian, hakarak realiza ajustamentu filafali ba dokumentu estratéjiku ida-ne’e, estruturamente no kondutór husi prosperidade nasionál, liuhusi estratéjika integrada ida, inkluziva, no reziliente, ne’ebé viabiliza artikulasaun no kreximentu husi setór oioin, hodi permite dezenvolvimentu sosiál no ekonómiku umanu ba país”, informa Ministru Prezidénsia Konsellu Ministru (MPKM), Fidélis Leite Magalhães iha Ministériu Finansas Aitarak Laran, kuarta (16/06).

Reajustamentu ida-ne’e iha mós konsiderasaun hodi hanoin hikas estratéjika sira husi médiu no longu prazu nian, atu hasoru dezafiu sira hanesan sira ne’ebé daudaun ne’e enfrenta, hanesan pandemia Covid-19 no dezastre naturál sira.

“Hakarak mós reajusta PED tinan 2011-2030 tuir objetivu sira no meta sira ne’ebé prevee iha Planu Rekuperasaun Ekonómika”, dehan nia. (*)