Tempotimor (Dili)-Komisaun A trata asuntu justisa no Konstituisional deside aban loron kinta (17/6) sei entrega relatáriu pareser kona-ba pakote lei eleitorál tolu ba meza Parlamentu Nasionál (PN) atubele ajenda debate jeneralidade.

Lei tolu ne’ebé sei aprezenta hanesan proposta-lei resensiamentu eleitorál, órgaun administrasaun eleitorál inklui eleisaun Prezidénsia.

Prezidente Komisaun A, deputadu Joaquim dos Santos ‘Boraluli’ deklara, dadun ne'e estrutura ba proposta lei tolu los hotu ona, inklui komisaun A mós desidi aprova ho unanimidade.

“Komisaun A aprova tiha ona relatóriu ba proposta lei tolu, lei ida kona-bá orgauns eleitorál, e proposta lei ida kona-ba alterasaun lei resensiamentu eleitorál, nune'e mós aprova relatóriu kona-ba lei eletorál ba Prezidente Repúblika (PR), aban ami haruka ba plenáriu”, informa nia iha PN, kuarta (16/6).

Durante audénsia ba proposta lei eleitorél tolu, parte komisaun mós simu opiniaun públiku balun, husi grupu minoria sira, hakarak atu troka naran Comição Nacionál de Eleições (CNE) ba naran seluk, maibé komisaun mós seidauk aseita tanba ida ne'e debate espesialidade mak hafoin deside bele ka la’e.

“Agora kona-ba naran ne'e se maioria konkorda dehan mantein CNE, porque mais popular be ita aseita, maibé atu muda ninia naran ne'e ita haree lai ninia filozofia ne'e saida. Maibé ne'e hanesan rekomendasaun de'it”, hatete nia. (*)