“Pasu ida ne'e ha'u hanoin pasu ida que importante tebes ba MTK iha setór telekomunikasaun ninia, iha ne'eba komponente tolu mak ita tau atensaun, operadór, kliente no autoridade nasionál komunikasaun ne'ebé nu'udar orgaun reguladór”, dehan Ministru Transporte no Komunikasaun (MTK), José Agostinho da Silva iha salaun konferénsia iha Kaikoli, tersa (15/06).

Tanba operadores telekomunikasaun no kompaña sira ne'ebé mak serbisu iha área telekomunikasaun, fornese servisu ba sira-nia kliente tenke ho kualidade no di'ak.

Nune'e ba kliente sira mós tenke hetan sira nia direitu ne'ebé mak di'ak e nune'e iha sentimentu ida ne'ebé ho satisfasaun ho operadór sira-nia atendementu.

“Atu haree no asegura entre operadór nia atendementu ba nia kliente, mak orgaun reguladór ANC tenke asegura no tenke observa sira-nia atendementu ba ninia kliente ne'e di'ak ou lae”, dehan Ministru.

Bainhira operadór telekomunikasaun la konsege atende kliente ho di'ak, mak konsumidór informa autoridade reguladór iha regra atu regulariza sira no ANC sei fó sansaun administrativa no penaliza sira multa.

Iha fatin hanesan Prezidente ANC, João Olivio Freitas hatete, iha setór ne'e oinsá atu asegura protesaun ba direitu konsumidór haksolok, operadór kontente no reguladór haksolok bainhira iha kompetisaun ne'ebé saudavel iha setór telekomunikasaun.

“Ezekuta didi’ak responsabilidade balun ne'ebé mak hakerek iha dekretu lei ligadu ho protesaun konsumidór ninia, primeiru ita lansa Gabinete protesaun konsumidór ANC ho razaun konsumidór sira sosa servisu husi operadór telekomunikasaun, depois de sosa ne'e sira iha direitu atu utiliza serbisu ne'ebé mak sira sosa”, dehan nia. (*)