Prezidente Bankada Fretilin iha Parlamentu Nasional katak Fretilin sei vota kontra ba pakote lejislasaun tomak ne'ebé VIII governu entrega ba Parlamentu Nasionàl. 

"Bankada parlamentar Fretilin deklara ba média no públiku tomak katak sei vota kontra pakote lejislasaun tomak ne'ebé VIII governu entrega ona ba PN iha semana kotuk, atu halo alterasaun ba lei sira ne'ebé relasiona ho tratadu fronteira marítima," deklara Prezidente Bankada Fretilin, Aniceito Guterres iha salaun Bankada Fretilin, Tersa (16/07/2019)

Bankada Fretilin, tuir Aniceto haree átu koligasaun Aliansa Mudanca Progresso (AMP) hahú lori TL ba situasaun ne'ebé ukun ho ditadura.

"Bankada Fretilin haree hahalok ida ne'e hatudu momós VIII Governu Konstituisional hakarak atu lori TL ba ukun ditadura ida nia okos, ne'ebé hamihis ka halakon respeita ba konstituisaun no lei sira," Aniceto tenik.

Tuir nia, VIII governu konstituisional bazeia ba ema ida nia interese hodi nasaun tomak hakruuk ba ema ida de'it. 

"Muda lei atu implementa vontade ema ida nian. Halo estadu tomak atu hakruuk ba ema ida nia vontade," dehan Aniceito. 

Prezidente bankada Fretilin ne'e lori bankada nia naran deklara katak, loloos lei atividades petrolifeiru labele hetan alterasaun liu dala rua iha lejislativa ida nia laran. 

Lei fundu petrolífeiru, tuir Aniceto nu'udar lei estrututante ida, ne'ebé labele sofre alterasaun narnaran de'it nomós pontu importante sira seluk. 

Nune'e, bankada Fretilin katak, partidu sira ne'ebé daudaun kaer ukun hakarak duni atu lori TL ba ukun, ho ditadura no tiránia maioria.

"Átu sira ne'e hatudu momos violasaun ba konstituisaun no lei sira no indikasaun forte. Halo governu no obriga PN atu hakruuk no halo tuir de'it ema ida nia hakarak," dehan Aniceito.

Fretilin mós haree katak iha tentativas ne'e atu obriga Prezidente Repúblika atu halo tuir mós ema ida nia hakarak. "Nune'e, mak bolu ditadura," tenik Aniceto.