Vise Ministra Solidariedade Sosiál no Inkluzaun, Signi Candrawati Verdiál hatete, dadaun ne'e, MSSI hahú hala'o diskusaun ho Ministériu Administrasaun Estatal (MAE) no xefe suku sira kona-ba pagamentu idozu no ema defisiénsia sira.
“Pergunta kona-ba subsídiu ba ema idozu ho difisiensia sira, atu informa iha ne'e katak tuir orariu ita sei halo pagamentu iha dia 20 de juñu, ita sei la kansela diretu ne’ebé idozu no difisiensia sira iha, diskusaun ita halo hela ho Ministériu Administrasaub Estatal (MAE), ho xefe do suku sira”, afirma Signi iha diskusaun kona-ba estratéjia ba prevensaun covid-19 iha plenária PN, segunda (14/06).
Enkuantu, iha loron 13 fulan-juñu, tékniku sira husi MSSI halo ona kordenasaun ho Sentru Intergradu Jestaun ba Krize (SIJK) hodi haree ba munisípiu sira ne'ebé risku ba propagasaun covid-19, nune'e bele halo jestaun interna atu limita pagamentu sira.
“Maizoumenus loron ida normalmente ita bele selu to'o 400 pesoál, ita bele limita ba 200 hanesan ne'e, ida ne'e mak servisu ne’ebé tékniku sira sei halo”, dehan nia.
Iha fatin hanesan deputada bankada CNRT, Maria Fernanda Lai hatete, durante iha implementasaun regra estadu emerjénsia, serka sanitária inklui konfinamentu obrigatório, fó mós konsikuénsia todan ba ema idozu nomós defisiente ne’ebé banku rasik kansela ka adia pagamentu ba sira.
“Oinsá ho sira-nia subsistensia, sira laiha empregu, la tama iha subsídiu ne’ebé governu tau iha lei ba covid ou rekuperasaun ekonomika, halo nusa para hodi bele fó mius ba sira atu moris, sira lakoi tane liman ba governu”, dehan nia. (*)