“Ha’u hakarak husu kona-ba sesta bázika, ne'e hotu ona ka sei kontinua tán, tanba hanesan ne'e señor ministru, iha Munisípiu Bobonaro suku ida Lahomea Vila até agora seidauk hetan sesta bázika”, haetete nia iha plenária Parlamentu Nasionál (PN), segunda (14/06).

Tanba, durante iha aplikasaun serka sanitaria, programa sesta bázika ne’ebé Governu liuhusi Ministériu Koordenadór ba Asuntu Ekonómiku (MKAE) implementa kuaze ladun sirkula ba munisípiu no populasaun suku Lahomea kontinua hein.

Ho ide ne'e, CNRT deskonfia osan laiha ona atu apoiu sesta bázika ba populasun, tanba durante ne'e sira observa, movimentu sesta bázika ba munisípiu sira la dun la'o.

“Ha’u hanoin señor ministru orsida bele tatoli netik mai ha’u kona-ba sesta bázika”, afirma nia.

Aleinde inundasaun iha loron 4 fulan-abril, kuaze akontese iha teritóriu tomak hodi estraga estrada no ponte no populasaun barak mak lakon uma maibé seidauk hetan intervensaun husi Governu.

“Ha’u haree oitavu governu ida ne'e halo de'it mak dalan ida protukolu iha embaixada Japaun nian ne'e”, dehan nia.

Dadaun ne'e obras hamutuk 9 iha munisípiu Bobonaro sai prioridade ba Governu atu responde ho urjentimente.

“Ha’u fó ezemplu iha munisípiu Bobonaro, iha fatin sia (9) ne'ebé mak tenke halo emerjénsia tebes. Tékniku sira husi Obras Públika, ADN, tun ona ba verifika, haree ona, maibé rezultadu to'o agora komunidade sira halerik”, deklara nia.

Hatan ba preokupasun ne'e, Ministru Asuntu Parlamentár no Komunikasaun Sosiál (MAPKOMS), Francisco Martins Jerónimo hatete, kestaun ne'ebé deputadu sira levanta iha plenáriu, governu rejista ona no sei submete ba Ministériu Konpetente sira atu buka solusaun. (*)