Tempotimor (Dili)-Juventude Frente Revolusionáriu Timor-Leste no Independente (FRETILIN-JF) rejeita informasaun kona-ba partidu Fretilin fahe fós ba populasaun iha Lorumata Suku Fatuhada.

Tanba filamajen balun ne'ebé viral iha mídia sosiál liliu facebook no youtube hatudu (povu  duni fila ekipa husi Partidu Fretilin ne'ebé koko atu fahe fós ba populasaun iha Lorumata), iha tempu kalan.

Ba kestaun ne'e, Responsável Adjunto Sekratáriu Jerál Juventude Fretilin, Efrem Trinquedos konsidera, JF informasaun ne'e falsu tanba to'o agora Fretilin seidauk fahe fós hodi obriga komunidade atu vota ba Fretilin.

“Fretilin fahe fós ne'e laiha, iha mais ne'e iha tempu ida mais ne'e ita atu ba fó solidadridade ba ita-nia vítima inundasaun sira, ne'e mak akontese. Agora sira ida dehan Fretilin fahe fós iha Lorumata ne'e, informasaun ne'e lalos, ne'e rejeita total”, hatete nia ba www.tempotimor.com iha CCF, Lurumata, segunda (14/06).

Tanba ne'e, husu ba entidade sira tenke aprezenta faktu, labele lori de'it boatu, tanba tempu agora ema barak mak toman ona lansa boatu no la aprezenta faktu.

“Se nia ba fahe fós ne'e halo nusa, fahe fós para obriga ema tenke vota ba Fretilin ne'e krime, e sira ida hetan tenke kaer, prósesa”, deklara nia.

Maske demokrasia loke dalan no la bandu ema hotu atubele hili opsaun polítika maibé iha opsaun ne'e la'ós obriga ema simu fós atu apoiu nia partidu.

“Se sira ba fahe fós, sira dehan katak Fretilin ba fahe fós ne'e halo nusa, nia hakarak atu ba ajuda ema, ne'e mós la sala ida, se nia ba fahe mak obriga dehan katak, obriga ema tenke vota ba Fretilin ne'e krime, ne'e sira ida hetan ne'e tenke lori ba polísia, ne'e mak los”, dehan nia.

Maske notísia ne’e públika seidauk hetan konfirmasaun husi autoridade lokál iha suku Fatuhada liliu Bairó Lurumata, tanba www.tempotimor.com tenta husu xefe aldeia Lurumata rasik laiha fatin.(*)