Print this page

CNRT Konsidera Governu Sei ‘Fakar’ Osan Ba Ró Tranship II

Ró Tranship II. Ró Tranship II. Foto Tempo Timor

Tempotimor (Dili)-Deputadu Bankada Congresso Nacionál de Reconstrução de Timór (CNRT) iha Parlamentu Nasionál (PN), Marcos Xavier, konsidera govenru sei fakar osan ba ró tranship II, tanba osan ne’ebé uza hodi aluga ró rihun-US$220 no kombustivél ba kada operasaun kuaze rihun-US$31.

“Kona-ba ró, iha semana liu-bá ami ba halo fiskalizasaun, ami haree duni ró ne'e nia kondisaun. Ita aluga tiha ró ne'e ho mill US$220, aumenta tan ho kombustivél 31 tonelada, se ita sura ba osan, hetan US$31 mill kada viajen ida, Se ró ne'e fulan ida nia halo viajen dala tolu, 31x3 ne'e osan hira?, osan lubuk boot ida”, hatete nia iha plenáriu Parlamentu Nasionál segunda (14/6).

Ho ida ne'e, governu atu uza osan ne'e ba apoiu prógrama hari’i uma ba kbi'it la'ek iha Timor-Leste.

“Nusa ita lakoi rai ba uma kbi'it la'ek, hanesan ohin deputadu Domingos de Carvalho ko’alia, ita bele halo uma kbi'it la'ek lubuk ida”, dehan nia.

Maibé CNRT mós kestiona tanba ró ne'e sei iha investigasaun hela, maibé Primeiru Ministru ho nia ekipa ba halo viajen ba Ataúro uza ró ida ne'e.

“Hanesan lei ne'e la vale, purzemplu hanesan ema ida lori motorizada karik, la'o polísia tránzitu (tahan) tiha, depois nia kontinua la'o nafatin. Ne'ebé ha’u hanoin ba oin, señor ministru iha konsellu Ministru (KM), toka tok ami-nia preokupasaun sira ne'e, se ró ne'e iha kazu hela, nusa la uza ró seluk”, hatete nia.

Hatan ba kestaun ne'e Ministru Asuntu Parlamentár no Komunikasaun Sosiál (MAPKomS), Francisco Martins Jerónimo hatete, deklarasaun kona-bá kazu ró Tranship II, dadauk iha hela prósesu investigasaun.

Tanba ne'e ejizénsia ne'ebé deputadu sira levanta iha plenáriu segunda (14/06), governu rejista ona no sei submete ba Ministériu Kompetente atubele responde hikas.

“Ne'ebé ida ne'e orsida ha’u sei hato'o filafali ba parte kompetente”, dehan nia. (*)

 

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items