CGT Aprezenta Rezultadu Peskiza Ba PR Featured

Prezidente da Republika sorumutuk ho CGT iha palasiu Prezidente Aitarak laran, Dili (15/07) Prezidente da Republika sorumutuk ho CGT iha palasiu Prezidente Aitarak laran, Dili (15/07) Foto Midia PR

Tempotimor (Dili) - Core Group Transparency (CGT), Segunda (15/07/2019) aprezenta sira nia deskobrementu peskiza, relasiona ho projetu hanesan Tasi Mane ba Prezidente Repúblika.

Porta Voz CGT, Juvinal Dias ba jurnalista iha Palásiu Prezidensial Bairropite hateten, durante hala'o peskiza, ekipa ne'e konsege identifika kazu balun kona-ba preokupasaun povu nian.

"Ami hakarak partilla katak ami hetan evidensia balun kona-ba preokupasaun povu nian. Espera, ami nia deskobrimentu ida ne'e, bele ajuda estadu Timor-Leste hodi responde ba preokupasaun povu nian," Juvinal tenik. 

Projetu tasi mane, hanesan auto estrada tuir peskizador ne'e, difikulta movimentu povu nian atu ultrapasa. 

"Ami hanoin, projetu ne'ebé ladun konsidera sosial no ambiental sei kria problema bo'ot ida ba povu. Prezidente Repúblika bele uza nia kompetensia rasik atu komunika ho governu. Atu nune'e iha polítika di'ak ida, bele iha estudu viabilidade kona-ba impaktu ambiental, impaktu sosiál, atu nune'e, projetu iha tasi mane ne'e, sei kontinua ba fututu labele akontese tan," Juvinal espera. 

Tuir CGT, auto estrada tasi mane sei faze primeira véz husi Suai ba Fatukai. Maibé, sei to'o iha Viqueque-Beasu. Nune'e, lakuna sira ne'ebé akontese iha Suai labele akontese iha Betanu no Viqueque-Beasu. Tanba projetu hirak ne'e konsideradu interese no partisipasaun povu nian ba foti desizaun. 

"Iha aspetu rua mak iha ne'ebá hanesan ema ne'ebé utiliza auto estrada no hela besik auto estrada. Auto estrada ne'ebé halo difikulta tebes ba sira ne'ebé hela besik iha ne'ebá, mezmu hafasil ema ne'ebé halo movimentu, maibé difikulta mos populasaun sira ne'ebé hela besik ba nia to'os no natar."

Tuir CGT haree, buat hirak ne'e akontese tanba laiha estudu viabilidade ba impaktu sosial, no dezeñu ne'ebé bazeia ba furak de'it, maibé la bazeia ba povu ne'ebé moris iha área ne'ebá. Tan ne'e, CGT husu ba governu, bainhira projetu ne'e sei kontinua fali, tenke konsidera populasaun ne'ebé mak hela besik projetu refere.

Rezultadu submisaun ekipa CGT entrega mós ba Timor Gap nomós Ministériu Obras Públiku (MOP) no entidades sira hotu.

Iha biban ne'e, Prezidente Repúblika apresia ba servisu CGT nian. PR kontinua enkoraza CGT ajuda governu, hodi foti desizaun.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com