Portavóz Juventude FRETILIN, Zeferino da Silva, konsidera deklarasaun polítika ba partisipasaun Timor-Leste iha Expo Dubai 2020, realidade moris sosiál no ekonómia ne’ebé mak nasaun Timor-Leste hasoru ho krizé saúde públika, sai preokupasaun tebes tanba la rezolve problema povu ni’an.
“Juventude FRETILIN kontinua rejeita nafatin programa Expo Dubai iha post Covid-19 no husu Governu atu konsentra de’it ba programa governu no planu rekuperasaun ekonómika hodi hatan problema sosiál no ekonómia ne’ebé povu Maubere hasoru hela no nune’e bele ajuda rezolve hikas bainhira ita tama ba era normal”, dehan nia iha Comite Central Fretilin (CCF), segunda (14/06).
Maske kazu pandemia Covid-19 ne'ebé Timor-Leste infrenta governu halo intervensaun maibé atividade ekonómia kontinua monu no negosiante ki’ik sira kontinua lakon rendimentu husi loron ba loron no traballadór barak lakon serbisu, tanba empregadór deside hapara sira-nia kontratu.
Nune'e númeru dezempregu aumenta bebeik, problema hirak ne’e mosu durante iha ukun tinan 10 no bainhira CNRT hanesan Bankada Governu nian, deside Xumba OJE 2020.
“Juventude FRETILIN sente triste ho deklarasaun Primeiru Ministru VIII Governu Konstitusionál, bainhira afirma Governu nia pozisaun ba partisipasaun Timor-Leste nian iha Expo Dubai 2020 kontinua iha tempu pandemia Covid-19, maibé iha rai laran Covid-19 sai hanesan bareira”, delara nia.
Maske Governu daualu Konstitusionál ne’ebé Lidera husi Primeiru-Ministru Jeneral Taur Matan Ruak harii Komissaun ida hodi elabora Planu Rekuperasaun Ekonómika atu normaliza hikas ekonómia ne’ebé monu no halo problema sosiál mós hetok at liután.
Tanba iha planu rekuperasaun ekonómika instrudus medida importante lubuk maibé Governu la kosentra hodi atinze programa governu ne’ebé hetan aprovasaun iha Parlamentu Nasionál.
Governu liuhusi Minstériu Turizmu, Komérsiu no Industria halo Programa Expo Dubai 2020 maibé haluha preparasaun rai laran nian hodi hasoru mudansa polítika no ekonómia iha nível reziaun no mundu.
“Juventude FRETILIN konsidera Partisipasaun Timor-Leste nian iha Expo Dubai 2020 ne’e hanesan ba gasta de’it povu nia osan maibé povu barak mak sei ki’ak, manutrisaun aumenta, bee-moos laiha no seluk tan”, dehan nia.
Ho ida ne’e, Timor-Leste presiza duni atu halo relasaun diplomatika ho nasaun hotu iha mundu, konstituisaun repúblika mós loke dalan maibé labele lori Expo Dubai 2020 hanesan programa primadona.
Husu mós ba Minstru Turizmu, Komérisiu no Industria, José Lucas da Silva, hanesan Prezidente Autoridade Nasionál Expo Dubai 2020 atu esplika didi’ak sá benefísiu mak Timor-Leste hakarak hetan husi Expo Dubai ba impaktu ekonómia no sosiál iha tempu badak no ba tempu naruk nian ho nia progresu no rezultadu.
Nune’e apela mós ba Komissaun D Parlamentu Nasionál no Bankadas Parlamentar sira atu debate urjénsia ho Ministru Koordenadór Assuntu Ekonómiku, Joaquim Amaral no Minstru Turizmu, Komérisiu no Industria, Jose Lucas da Silva nu’udar mós Prezidente Autoridade Nasionál ba Expo Dubai iha tempu badak.
“Juventude FRETILIN kontinua fó konfiansa tomak ba Primeiru Ministru VIII Governu Konstitusionál Jeneral, Taur Matan Ruak maibé Juventude FRETILIN mós rejeita nafatin programa Expo Dubai 2020”, hatete nia. (*)
