Apoiu ne’ebé governu Austrália oferese liuhusi Timor-Leste Police Development Programme (TLPDP) atubele fasilita UPM hodi halo seguransa ba komunidade sira.
"Ha'u hakarak, hamutuk ho señor komandante jerál PNTL, señor vise ministru interior, ita hotu, agradese ba apoiu husi TLPDP nian, embaixada no governu Austrália nian ba kooperasaun di'ak, ne'ebé ita hala'o iha tinan ida ne'e no tempu oin mai”, deklara PM Taur Matan iha inagurasaun postu seguransa, Ataúro, sesta (11/06).
Durante tinan barak nia laran, Governu Austrália liuhusi TLPDP fó ona ajudu barak mai TL, tanba iha kooperasaun ho área defeza no seguransa nian.
"Defeza nian ita iha kooperasaun ho Falintil FDTL iha parte komponente hothotu, liliu komponente terrestre ho mós komponente marítima. Mais tamben, ita iha koopersaun foun ho PNTL iha tinan barak, mais tinan hirak ne'e komesa intensifika para bele ajuda hadi'a buat ne'ebé presiza hadi'a, bele operasionaliza di'ak liután prezensa ita-nia PNTL iha fatfatin”, hateten Taur.
Ezisténsia postu seguransa foun iha Akrema, sei lori seguru liutan ba komunidade sira iha área fronteira, tanba prezensa PNTL nian, la'ós atu impede atividade negósiu komunidade sira-nian, maibé atu tulun no fasilita.
"La'ós atu impede inan-aman sira, foinsa'e sira-nia atividade iha Akrema, pelu kontráriu ajuda fasilita atu atividade ita-boot sira nian la'o di'ak liután iha ne'e, ba futuru”, haktenik nia.
Reprezentante Embaixadór Austrália, Philippa Venning dehan, hanesan belun no viziñu, Austrália ho TL iha parseira ida forte no rekoñese katak, fronteira ne'ebé seguru mak importante tebes, tanba iha razaun barak.
"Austrália orgullu atu apoia PNTL no governu Timor-Leste hodi hari'i postu foun sira, inklui ida ne'e (postu Akrema) iha Timor-Leste laran tomak, liuhusi ami-nia programa dezenvolvimentu polísia Timor-Leste, hamutuk ami sei apoia konstrusaun postu foun 6, inklui postu 4 ne'ebé ita hari'i ona iha Wefauk no Bora iha Bobonaru, Loes iha Likisá, no iha Akrema ne'e", informa nia.
Postu seguransa foun ne'e, hala'o husi Kompaña Caltex hahú iha inísiu fulan-agostu tinan 2020 no iha loron sestaa (11/06) inaugura husiPM Taur Matan Ruak, ho apoiu finanseiru husi governu Austrália nia TLPDP hodi entrega mós motorizada rua ba membru sira halo servisu kontrolu. (*)