Login to your account

Username *
Password *
Remember Me

PR Lú OLo Lansa Livru ‘Buibere Hamriik Ukun Rasik An’

Prezidente Repúblika, Francisco Guterres 'Lú Olo', halo hela asinatura ba livru. Prezidente Repúblika, Francisco Guterres 'Lú Olo', halo hela asinatura ba livru. Foto Suplay

Tempotimor (Dili)-Prezidente Repúblika, Francisco Guterres 'Lú Olo', iha loron kinta (10/06) lansa ona livru ‘Buibere Hambriik Ukun Rasik An’ iha selebrasaun loron istóriku Levantamentu Marabia ne’ebé iha loron 10 juñu tinan 1980.

“Ho laran-ksolok tebes no orgullu boot mak ha’u lansa ohin (10/06) obra importante ida, la’ós de’it ba ita-nia feto as’uain sira, maibé ba mós ita hothotu, jerasaun ohin nian no abanbairua nian”, hatete Xefe Estadu iha palásiu prezidensiál Bairopite, kinta (10/06).

Iha livru ne’e sura istória luta barani feto sira-nian lansa iha Palásiu Prezidénte Nicolau Lobato asosia ho data importante tebes ida, iha Luta Libertasaun Nasioná- Levantamentu Marabia, iha loron 10 fulan-juñu 1980.

“Husi ita-nia istória rasik, mak ita bele hasai lisaun oioin ba ita-nia moris ohinloron no ba abanbairua. Istória sura iha livru Buibere Hamriik Ukun Rasik An haree ba pasadu ida ne’ebé nakonu ho barani, determinasaun no dedikasaun, maibé ho mós halerik oioin ne’ebé sei hakanek hela sobrevivente sira”, afirma Lú Olo.

Livru ne’e mai husi inisiativa Organizasaun Popular da Mulher Timor (OPMT), nu’udar organizasaun massa FRETILIN nian, maibé reflekte feto hothotu ninia kontribuisaun ba luta, husi tinan 1974 too 1999.

 Ho kontestu koletivu ida ne’e mak Líder Istóriku hothotu fó apoiu totál no inkondisionál, hahú ho festa angariasaun fundu iha tinan 2010 no hetan mós apoiu finanseiru husi Gabinete Primeiru Ministru. Organizasaun oioin, timoroan, inklui emprezáriu sira, hatán ho apoiu di’ak tebes ba inisiativa ida ne’e.

“Ho haksolok boot mak ha’u haree katak ekipa hothotu, hari’i ba produsaun livru ne’e, kahur feto ho mane, jerasaun tuan ho jerasaun foin-sae”, hatutan nia.

Dalan ida ne’e permite fahe esperiénsia no tau hamutuk matenek ida-idak nian, husi jerasaun oioin no konsege duni prodúz obra koletiva ida ne’ebé sura no interpreta Istória Luta Libertasaun Nasionál ho perspetiva timoroan sira-nian, ho apoiu husi Nugroho, Titi no Kelly Silva.

Obra ida ne’e fó-sai ba dahuluk, no klean tebtebes, saída loos mak feto Timooan sira halo ho barani, nu’udar indivídu ka liuhusi organizasaun polítiku-partidária ka la’e, husi 1974 to’o 1999, iha rai-laran no iha rai-liur.

“Ita-nia buibere sira hatene duni foti inisiativa, organiza-an ho espíritu kriativu no matenek rasik, hatene mós oinsá lidera kna’ar oioin ne’ebé dala barak envolve mós mane sira, tuir kbi’it ho meiu sira ne’ebé iha, hodi partisipa iha prosesu luta libertasaun pátria iha frente luta hothotu”, dehan Lú Olo.

Tanba obra ne’e reflete mós importánsia papel feto sira-nian iha prosesu tomak luta nian, iha Frente Armada, Klandestina no Esterna.

Líder istóriku na’in lima asosia-an mós ho livru ne’e tanba sai autór ba prefásiu. Nune’e, líder sira ne’e mós rekoñese no valoriza feto timoroan sira, nu’udar parseiru luta-nain!  Aleinde Prezidente Repúblika, prefásiu hakerek mós husi líder istóriku Kay Rala Xanana Gusmão, José Ramos Horta, Jenerál Taur Matan Ruak no Mari Alkatiri.

Livru ne’e iha dimensaun nasionál ho valór sosiál, polítiku, istóriku no edukasionál as tebes ba jerasaun hothotu. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter