Kona-ba kazu refere, nia hun hahú ho saida, ida ne'e seidauk hatene los, maibé prosesu ne'e la'o hela no suspeitu agora iha prizaun preventiva.
"Iha kazu ne'ebé akontese ne'e ita kondena, laiha kazu que justifika, para ita uza violénsia, sa tan hanesan kazu partikular Lahane nian, mesak uma lisan ida, família ida, ne'e kasian los”, dehan PM Taur hafoin sorumutu ho Prezidente Repúblika, Francisco Guterres ‘Lú Olo’, iha palásiu prezidensiál Bairopite, kinta (10/06).
Maibé apela ba povu atu define ema ida mak sala, ne'e ema ida mak sala, labele dehan ema hotu mak sala.
"Família Antonio nian, sé João mak sala, entaun João mak sala, la'ós família tomak sala hotu, nune'e Polísia Nasionál Timor-Leste (PNTL) mós hanesan", konta Taur
Sidadaun hothotu atu mantein respeitu no mantein kooperasaun di'ak ho instituisaun PNTL ho F-FDTL tanba instituisaun rua ne’e.
"Dadaun ne'e, governu diskute hela instutu PNTL maibé problema ne'e iha kontrolu kona-ba oinsá lori kilat, kontrolu emosaun, tanba ita kaer kilat, tudik tenke kuidadu, ita tenke konfia uluk ita-nia an, buat sira ne'e halo di'ak, mais iha mós aat ba ita”, dehan nia.
Normalmente ema ne'ebé sai polísia, sai forsa armada ne'e kontrolu-an, kontrolu emosaun forte no presiza treina di'ak.
"Ita-nia nasaun ne'e, nasaun demokrátiku, ne'ebé respeita direitu humanu, respeita ema nia direitu, apezar ita-nia mensajen ne'e klaru no krime hothotu ita la tolera", hatenik Taur.
Entretantu Komandante Jerál Polísia Nasionál Timor-Leste (PNTL), Faustino da Costa deklara, relasiona ho estatutu PNTL sira aprezenta ona ba governu nune'e hein katak sei hetan rezultadu.
“Tanba ne'e mak iha proposta ida komandu sei prepara, la'ós estatutu pesoál polísia, maibé propria organika regulamentu disiplinar, no rejime sira ne'ebé mak iha ligasaun ami aprezenta ona ba governu, fiar katak sei hetan rezultadu ida di'ak", informa nia. (*)