Tuir prezidente UNETL Idelta Maria Rodrigues ba jornalista sira iha palásiu prezidensial bairro pite katak, Timor Leste primeira véz partisipa iha atividade Jambore iha Amerika. 

"Ohin marka tan istória foun iha juventude Timor Leste ne'ebé mahon iha Uniaun Nasional Eskuteru Timor Leste (UNETL). Depois TL sai tha membru mundial, TL manda nia kontizente ho naran Contigente Crocodilo atu ba partisipa hamutuk ho nasaun seluk iha mundu tomak, atu reprezenta TL hodi partisipa iha Jambore mundial iha West Virginia, Amerika", dehannPrezidente UNETL Idelta Maria Rodrigues, Sesta (12/07/2019).

Idelta dehan, joven sira ne'e sei reprezenta TL atu hamorin TL nian naran iha eventu Jambore ne'e.

 "Juventude sira ne'ebé iha ha'u-nia kotuk ne'e reprezenta ita-boot sira-nia munisipiu nu'udar duta-duta besar TL nian par bele hola parte iha Jambore iha America."

 "TL haruka kontizentes hamutuk 14 kompostu husi exploradores feto na'in haat, mane na'in neen no dirizentes nain haat", dehan Idelta.

 Entretantu reprezentante Kontizentes Nelia da Silva Maia dehan hanesan juventude TL, sente orgullu tanba bele reprezenta TL iha EUA.

 "Sente orgullu tebes tanba bele reprezenta nasaun TL no hanesan primeira véz ami husi UNETL partisipa Jambore iha EUA hodi promove TL no dezenvole ami-nia koñesimentu inklui aprende iha ne'ebá hafoin fila mai dezenvolve fali Uniaun Nasonal Eskuteru Iha TL", dehan Nelia

 Nasaun sira ne'ebé partispa iha Jambore mundial iha EUA ne'e hamutuk nasaun 133 no 30.000 partisipantes.