Tempotimor (Dili)-Prezidente Parlamentu Nasionál, Aniceto Guterres deklara, Parlamentu Nasionál (PN) planu ona sei kria lei sibernetika hodi regula espresaun sidadaun sira iha mídia sosiál atu sai sivilizadu.

“Deputadu sira iha hanoin tanba hanesan reprezentante povu hanoin atu hola inisiativa para kria lei sibernetika”, dehan nia hafoin sorumutu Prezidente Repúblika, Francisco Guterres ‘Lú Olo’ iha Palásiu Prezidensiál Bairopite, tersa (08/06).

Bainhira ko'alia kona-ba liberdade mundu ne'e, laiha liberdade ne'ebé, liberdade trata ema, tanba liberdade hanesan ne'e bele destroi moral sivilizasaun sosiedade nian.

Tanba ne’e mak akontese iha Timor-Leste ema uza mídia sosiál atu hotar ema seluk, maibé timoroan nia sibilizasaun la'ós hanesan ne'e.

“Ida ne'e sai hanesan kestau ida, tanba ne'e reprezentante povu iha parlamentu nasionál iha hanoin atu rezolve problema sira ne'e atu asegura nafatin morál, oinsá sosiedade Timor sai sivilizadu”, afirma nia.

Iha sosiedade ida hakarak espresa nia opiniaun iha mídia sosiál tenke iha sivlizadu, ema la bandu ema ida atu espresa opiniaun, maibé  tenke regula.

“Kona-ba lei sibernetika parlamentu nasionál iha inisiativa, tanba iha kompeténsia atubele hola inisiativa ba lei refere, depois aprova ka la aprova tuir prosesu, maibé hanesan orgaun soberanu iha inisiativa kria lei sibernetika”, haktenik nia.

Entretantu, lei sibernetika hanesan deputadu sira-nia opiniaun no inisiativa de'it no seidauk transforma. (*)