Tanba regra ne’ebé implemeta ba prevensaun Surtu Covid-19, SIJK sai hanesan implementadór ba medida ne’ebé governu no laiha kompetensia atu foti desizaun ba asaun sidadaun sira hasoru desizaun Governu.

“Agora, desizaun hanesan moto ida husi ministériu saúde katak, saúde iha ita ida-idak nia liman. Sé o hakarak kuida o nia saúde, tuir. Se o lakohi prontu, problema o nian. Ita hanoin malu, mais ita mós laiha poder ida atu impõem. Ne'ebé situasaun mak ida ne'e”, dehan Aluk hafoin sorumutuk ho Primeiru Ministru, Taur Matan Ruak, iha rezidénsia Farol, segunda (07/06).

Tuir loloos Governu bele foti medida ba sidadaun ne’ebé kontra regra, tanba implementadór medida labele foti desizaun hasoru sidadaun ida.

“Ha'u atu dehan de'it ba imi katak, ami instituisaun ida ne'ebé mak sai hanesan implementadór ba medida ne'ebé governu foti. Governu de'it la foti ona medida, kuantu mais ami ida implementadór atu foti medida”, afirma nia.

Tanba pandemia Covid-19, hanesan mós funu, maibé la hanesan funu ida uluk Falintil sira halo, ne'ebé inimigu bele haree hetan.

“Mais ida ne’e ita la hetan. Agora sé mak kona, sé mak la kona, ita lahatene. Maibé, ita mak tenke sente ba ita nia-an katak, sé realmente virus ne’e iha, di'ak liu ita prevene, duke ita tama ba risku ida ne'ebé bele halakon ita-nia vida”, informa nia.(*)