Deputadu Fretilin, Joaquin dos Santos hatete, ba oin instituisaun PNTL tenke tau prioridade intensifika ba servisu psiketria hodi haree membru ne’ebé iha moras psikolojia, tenke haruka ba tratamentu, nune'e labele hamosu problema iha instituisaun laran.
"Ha’u hanoin polísia ba oin tenke intesifika ho servisu Psiketria, iha korpu polísia ninian ne'e, periodikamente atu haree tok membru sira ne’ebé iha moras psikolójika haruka ba kura”, dehan nia iha PN, segunda (07/06).
Husu mós ba lideransa PNTL atu Iha futuru halo rekrutamentu ba membru foun, tenke haree didi’ak, ema nia psikis (psikolojia), tanba instituisaun polísia ne'e presiza ema normal.
"Se nia aseita tama iha polísia nia tenke hatene ona saida mak nia atu halo, ne'e skgnifika nia sai husi regra ka fora da regra. Ne’ebé iha prosesu ba rekruta ema foun ha’u hanoin polísia tenke haree didi’ak mekanizmu, kritériu kona-ba ida ne'e”, hatete nia.
Entretantu, Deputadu PD, Mariano ‘Asanami’ Sabino hatete, tempu ona tenke halo jestaun psikolojiku ba ema sira servisu iha instituisaun F-FDTL no PNTL.
"Porque la'e psikolojikamente ema balun ho kondisaun Stres hela mais fó tan kilat, e sira rasik dala ruma iha konflitu privadu, fó tan kilat prontu sira utiliza sala”, dehan nia. (*)