Durante ne'e lider nasional sira, liuliu jerasaun antigu sira la hatudu jestu polítika ne'ebé saudavel, tanba sempre buka hatun malu no dezakredita-malu.
Tanba ne'e, tuir Xefe Estadu Maior Jenerál FALINTIL-Forsa Defeza Timor-Leste (F-FDTL), Majór Jeneral Lere Anan Timur dehan, bainhira lider nasional sira mak husik malu no la'o ida-idak nian, sei fó impaktu iha futuru lideransa Estadu Timor Leste nian.
"Husu nafatin para sira hamutuk konsensu ba interese nasional nian, ida-ida labele la'o ninian", tenik Majór Jenerál Lere, iha Palásiu Prezidensiál Bairru-Pité, Kuarta (10/7).
Maski nune'e, nia husu jerasaun foun sira atu laran metin ba lider nasional sira ne'ebé sei moris.
Tuir Jenerál Lere, lider nasional sira ne'ebé sei moris la barak ona. Tanba ne'e, jerasaun foun sira tenke buka atu aprende no prepara aan ba futuru lideransa nian hamutuk ho lider nasional sira.