"Ohin (04/06) ita hetan doasaun husi TLPDP hanesan komputadór 12, meja 10, kadeira 25", dehan Komandante Administrasaun PNTL, Superintendente Polisia, José Soares, iha komandu jerál Kaikoli, sesta (04/06).
Ho apoiu material hirak ne'e, hodi responde ba dezastre ne'ebé akontese iha loron (04/04), hodi halo estragu ba ekipamentu PNTL nian iha Kuartel Jerál.
Maske apoiu sira ne'e, labele kobre ba diresaun hotu, maibé garante sei utiza ekipamentu sira ne'e ho didi’ak, tanba komandu mós tau ona iha planu atu sosa tan komputadór ba PNTL hodi kompleta tan fasilidade sira.
Fasilidade hirak ne'e, sei distribui ba sesaun jurídika, relasaun públika, departamentu Finansa, Servisu Investigasaun Kriminal (SIK), Unidade Tranzitu, Departamentu Aporvizionentu, Servisu informasaun Polísia no seluk tan.
"Karik ita-nia doasaun ne'e labele kobre, ita sei esforsu atubele kobre ho komputadór sira ne'ebé PNTL sei sosa iha planu de kompra tuir mai", dehan nia.
Komandante Jerál (PNTL), Komisáriu Polísia, Faustino da Costa, agradese ba parseiru sira husi TLPDP, tanba kontinua iha kompromisu hodi apoiu PNTL.
Apoiu hirak ne'e, nu'udár parte husi rekuperasaun, atu responde impatu husi inundasaun ne'ebé estraga mós ekipamentu sira iha komandu PNTL rasik.
"Ekipamentu sira ne'e atributu ba Komandu PNTL, tanba ne'e membru sira tenke utiliza sasán sira ne'e tuir nesesidade servisu nian, uja ho kuidadu, no didi’ak ba asuntu serviau nian”, dehan nia.
Durante instituisaun PNTL hari'i, TLPDP sempre fó nia tulun iha situasaun saida de'it hodi reforsa polísia nia servisu, tanba ne'e husu membru sira atu utiliza tuir nesesidade. (*)