Tempotimor (Dili)-Bankada Congresso Nacional de Reconstrução de Timorense (CNRT) iha Parlamentu Nasionál (PN) defende Prezidente Partidu CNRT, Kay Rala Xanana Gusmão ne’ebé halibur komunidade sira hodi kontra deklarasaun Prezidente Repúblika (PR), Francisco Guteres ‘Lú Olo’ ne'ebe dehan figura públika balun la hadomi povu.

Xefe bankada CNRT, Duarte Nunes hatete, tuir lolos Prezidente Repúblika tenke tetu molok hasai deklarasaun hatete Xanana.

Tanba, atu hadomi povu ne'e, Xanana uza nia karakter rasik no la'ós tur de'it mak hatete dehan hadomi povu.

“Seraké ida ne'e la'ós ema ida que hadomi, ka tenke tur de'it iha uma, hanoin dehan oh ha'u hadomi povu, mais povu susar hela, ida ne'ebé mak los. Prezidente tetu ba, labele hatete at ema (Xanana)”, deklara nia iha PN, tersa (01/06)

Pozisaun CNRT mós nota entre prezidente repúblika ho Xanana ne'e, sira iha presepsaun no karater rasik.

"Bom, buat ida hadomi povu ne'e, relativu ne'e, iha kaca mata, prezidente nia ne'e hadomi povu ne'e hanusa, agora maun Xanana nia ne'e hadomi povu ne'e hanusa, ida-idak nia presepsaun ninian”, afirma nia.

Nia dehan, "Sé ha’u ba fatin ida ema haklalak mai kaer liman ho ha’u, seráke ida ne'e la'ós ema ida ke hadomi, ka tenke tur de'it iha uma, hanoin dehan, oh hau hadomi povu, hadomi povu, mos povu susar hela, ida ne'ebe mak los”.

Tanba ne’e, Prezidente Repúblika tetu no labele hatete at ema, mais hanesan ema hatete bainhira hatudu liman fuan 1 ba ema, liafuan haat sei filafali ba na’in.

Antes ne'e, Prezidente Repúblika (PR), Francisco Guterres 'Lú Olo', liuhosi nia mensajen ba Parlamentu Nasionál (PN) kona-ba estensaun estadu emerjénsia ba dala-14, aproveita 'soe' lia mós ba Figura Públika (FP) balun tanba la obedese ba regra governu nian liliu iha kombate Covid-19.

Tanba, figura públika ho responsabilidade labele hatete, sira hadomi povu no preokupa ho moris-di’ak no saúde povu nian, maibé la kumpri fali regra bázika sira ba protesaun hanesan distansiamentu sosiál no uza máskara ka la respeita konfinamentu domisiliáriu, ho motivu ne’ebé de’it ka ho hanoin ba sira-nia aan de’it.

“Halibur ho populasaun iha fatin públiku lahó máskara no lahó distansiamentu sosiál sei la kontribui atu hapara vírus corona,  maibé sei loke dalan ba vírus aat ne’e hada’et liután husi ema ba ema”, dehan PR Lú Olo, liuhosi nia mensajen ba PN, domingu (30/05). (*)