Tanba iha tinan 2013, Timor-Leste submete ona ba Komisaun Direitu Labarik nian iha Nasaun Unida, no relatóriu kona-ba implementasaun konvensaun, no simu rekomendasaun atu dezenvolve Planu Asaun Nasionál ba Labarik, maibé durante ne'e, labarik sira kontinua hala'o servisu ema boot nian.

"Implementasaun konvensaun, ladun fó atensaun. Labarik ne'e importante tebes ba nasaun. Sira laiha tratamentu dignu, responsabilidade la'ós de'it governu, maibé husu ba inan aman, sosiedade sivíl, no ba ita hotu, oinsá ita bele fó tratamentu ida di’ak liután ba labarik sira”, hatete nia iha PN, tersa (01/06).

Durante ne'e, Bankada FRETILIN mós preokupa tanba iha sidade Dili, dala barak haree labarik sira mak hala'o fali atividade negósiu.

"Ha’u hanoin ida ne'e ita tenke hapara ona ida ne'e. Tuir lolos inan aman sira mak ba halo servisu ida ne'e, oan sira tuir lolos hela uma ba eskola, estuda”, dehan nia.

Iha fatin hanesan, Xefe Bankada Congresso Nacional de Reconstrução de Timor (CNRT), Duarte Nunes, husu Governu tenke fó protesaun ba labarik ne'ebé abandona husi inan no aman sira tanba Timor-Leste ratifika ona konvensaun internasional.

“Kuandu implementasaun hosi konvensaun ne’e ladi’ak entaun Komisaun Nasionál Direitu Labarik ne’e mak tenke ko’alia sai ka hatama proposta-lei ruma hato’o mai Parlamentu Nasionál no Governu nune’e ita bele hamutuk hodi fó protesaun ba ita-nia labarik sira”, afirma nia. (*)