Tanba ne’e, Diretór Fongtil nu'udár pesoál jurídiku no hanesan responsável máximu sei koolabora iha prosesu hotu.

“Ho notifikasaun refere, Fongtil hakarak deklara ba públiku katak, sei koolabora iha prosesu hotu, tanba Fongtil nu'udár pesoál jurídiku no ha'u hanesan responsável máximu ba Fongtil, ami hakarak expresa ba públiku no hatudu ami-nia atitudade hanesan sidadaun di'ak”.deklara Diretór ezekutivu FONGTIL, Daniel do Carmo da Silva liuhusi konferénsia imprénsa iha Kaikoli, tersa (01/06).

“Fongtil asume responsábilidade ba publikasaun refere tanba autoriza husi ha'u hanesan diretór ezekutivu, no publikasaun ne'e hatudu ami-nia kapasidade ba públiku katak ami halo  advokasia bazeia ba dadus no faktu”, dehan nia.

Fongtil nia funsionáriu sira halo servisu bazeia ba orientasaun servisu, tanba ne'e sira firme halo servisu hodi defende ema kbi'it laek tuir misaun no prontu koolabora iha prosesu tomak hanesan sidadaun di'ak, nune'e bele hetan justisa ne'ebé justu iha tribunál.

Hanesan sosiedade sivíl ne’ebé reprezenta povu, ko’alia saida mak povu sente, iha ne'ebé de'it povu hakarak atu hatudu evidénsia.

"Rezultadu visum ne'ebé ami públika, hanesan evidénsia ba vítima hodi hetan justisa. Sé polísia tauk lialoos, entaun polísia defende sé loos. Defende vítima ka, defende aktu bandalizmu no premanizmu atu buras iha instituisaun PNTL”, afirma nia.

Entretanto Advogadu Privádu, Fernando da Costa afirma, ema ida-idak labele halo interpretasaun ba lei tuir nia hakarak, bainhira seidauk iha baze legal ruma.

Tanba, rezultadu visum ne'ebé parte FONGTIL halo, tuir duni regra no prosedimentu sira legál ninian.

"Purtantu, ida ne'e maka sira (PNSIK) konsidera dehan katak krime, atu hatete katak ita labele uza analojia hodi kualifika ka interpreta lei ida atu kondena ema ida, nia hanoin no ita hakarak, ne'e lei proibidu”, dehan nia.

Lei ida ne'ebé atu hatete dehan aktu ida ne'e krime,  tenke hatene, ninia rekezitu krime ne'e mak ida ne'ebé.

Ho ida ne’e, husu ba instituisaun PNTL liuhusi unidade PNSIK atu labele halo interpereta buat ruma, bainhira laiha baze legál ruma hodi akuza ema seluk sai fali suspeitu.

Karta notifikasaun PNSIK ba FONGTIL ne'e, iha loron segunda (31/05), bazeia ba lei Kódigu Prosesu Penál, artigu 92, alinea 6, relasiona ho kazu krime violasaun ba justisa nia segredu iha artigu 291 iha kódigu penál TL, númeru prosesu NUC 0120/21.PNSIC.

Nune'e, mós kazu insidente agresaun fizika husi membru PNTL na'in rua hasoru negosiante nu'u Octavio Thai iha área Tasitolu, domingu (23/05). (*)