Tempotimor (Dili)-Instituisaun Estadu tolu deside sei regula tratamentu proposta individual Funsionáriu Públiku (FP) ne’ebé durante ne’e aprezenta hodi hetan formasaun no bolsu estudu iha rai-laran no estranjeiru.
Tanba ne’e, instituisaun sira ne’e hanesan Komisaun Funsaun Públika (KFP), Institutu Administrasaun Públika (INAP) ho Fundo Dezenvolvimento Capitál Humano (FDCH) selebra akordu ida hodi halo monitorizasaun.
Komisáriu Komisaun Funsaun Públika (KFP), António Freitas hatete, akordu ida ne'e atu regula no kumprimenta ba dekretu lei sira seluk. Hanesan dekretu lei númeru 13/2021, nomós dekretu lei 38 kona-ba formasaun ba FP sira.
“Ida ne'e atu regula kona-ba odamatan ida de'it sobre tratamentu formasaun ba ita-nia funsionáriu públiku sira ne'ebé durante unilateralmente ida-idak ba aprezenta ninia proposta iha FDCH. Entaun, bainhira remata, ita lahatene, ita sempre halo levantamentu dehan, falta rekursu umanu, afinal ida por ida, depois remata, laiha ema ida filafali mai atu kontinua servi ita-nia estadu, mais ba fali fatin seluk”, esplika António Freitas iha Matadouro, segund (31/05).
Husi kooperasaun ne’ebé hala'o iha edifísiu KFP Matadoru, atu foka liu formasaun ba funsionáriu públiku sira husi parte instituisaun tolu nian.
Ho ida ne’e KFP, INAP no FDCH kria morandu ida ne'e atubele servisu ho kooperasaun di'ak liután, hodi regula no monitoriza, avalia FP sira ne'ebé tuir formasaun iha rai laran nomós liur, assisténsia bolsu estudu, kursu formasaun sira seluk ne'ebé tutela ba kompeténsia instituisaun sira ne'e.
“Ita hili de'it instituisaun superior sira ne'ebé hetan rekuñesimentu husi instuisaun tolu, la’ós ba hothotu. Ami enkamiña ba INAP, depois FDCH”, hatete nia.
Nune’e Diretór Jerál Institutu Nasional Administrasaun Públika (INAP), Agostinho Letençio de Deus hatete, assinatura ne’ebé ko'alia kona-ba formasaun, bolsa estudu ho assisténsia estudu, ne’ebé prosesu hotu termina ona ho kritériu.
“Ita iha ona rekezitu sira ne'ebé mak funsionáriu ida-idak tenke kompleta, e depende ba tipu saida, formasaun ka bolsu estudu ka ou assisténsia estudu. Kada tipu ida-idak, iha nia kritéria no rekezitu rasik”, dehan nia.
Entretantu Diretóra Fundo Dezenvolvimento do Capitál Humano (FDCH), Leila Cárceres dos Santos afirama, iha tinan 2021, orsamentu ne'ebé rejista iha livru 6, ho valór hamutuk rihun US$816, ne'ebé FDCH atribui ba INAP atubele haree ba programa haat (4) iha asuntu formasaun ninian.
“Formasaun ne'ebé tau iha programa formasaun ba área jenérika, espesialidaza, e bolsa estudu nomós apoiu subsídiu ba estudante funsionáriu públiku sira. Entaun, ita foka liu mak ba funsionáriu públiku sira”, afirma nia. (*)
