Ministru Prezidensia Konsellu Ministrus, Fidélis Leite Magalhães hatete, hafoin analiza aprezentasaun pontu situasaun epidemiolójika país nian, husi koordenadór sira husi Sala Situasaun Sentru Integradu Jestaun Krize nian (SIJK), Konsellu Ministrus aprova ona medida sira ba ezekusaun Deklarasaun Estadu Emerjénsia, ne’ebé efetua husi Dekretu Prezidente Repúblika nú. 35/2021, loron 28 fulan-maiu, hodi hatán ba pandemia COVID-19.

“Estadu emerjénsia, ne’ebé renova daudaun ne’e, abranje territóriu nasionál tomak no vigora husi tuku 00:00 loron 2 fulan-juñu tinan 2021 no tuku 23:59 loron 1 fulan-jullu tinan 2021”, dehan nia iha komunikadu imprensa, segunda (31/05).

Kona-ba medida ezekusaun sira anteriór deklarasaun Estadu Emerjénsia nian, rejista de’it alterasaun, hodi estabelese nafatin katak indivíduu sira ne’ebé ho sertifikasaun vasina kompleta kontra COVID-19, bele sirkula livre iha territóriu tomak, ne’ebé inklui munisípiu sira ne’ebé abranje husi impozisaun serka sanitária no konfinamentu domisiliáriu.

“Regra sira seluk mantein liliu mantein nafatin obriga sidadaun sira hotu ne’ebé hela iha Timor-Leste atu mantein distánsia pelumenus metru ida ho ema seluk ne’ebé la hela iha ekonomia komun”, afirma nia.

Maibé, kontinua obriga atu utiliza máskara oin nian ne’ebé taka inus no ibun bainhira hakarak tama ka hela iha fatin públiku ka privadu hirak ne’ebé ema hotu uza no fase liman bainhira hakarak tama ba estabelesimentu komersiál sira, industriál ka prestasaun servisu nian ka ba edifísiu sira iha ne’ebé  servisu administrasaun públika nian funsiona.

Husi ne’e ema hothotu iha obrigasaun mós atu evita formasaun halibur-malu, iha dalan públiku. (*)