Tuir Prezidente Bankada CNRT ne’e, governu AMP halo ona serbisu durante tinan ida nia laran, maibé promesa atu kria kampu serbisu rihun 30 kada tinan ne’e seidauk realiza.
Ida ne’e, nia dehan, tanba membru governu ne’ebé la kompletu.
“Kria kampu serbisu 60.000 ne’e hanesan hakarak ida husi governu ida, buat ida mehi ne’e, mehi ida, maibé ita mós tenke hanoin katak, governu halo serbisu, maibé governu tenke kompletu,” dehan nia iha Parlamentu Nasionál, Tersa (09/07).
Nia hatutan, governu defisil atu realiza ninia mehi hodi kria kampu serbisu tanba Prezidente Repúblika pendente kandidatu membru governu nain sia.
“Governu foin hamri’ik Prezidente (Repúblika) kesi nia ain, dada la’o mós la di’ak, ita atu ko’alia halo nusa, ne’e mak situasaun. Ita ezije buat barak ba governu. Governu ida mehi tanba ninia ema kompletu mak halo serbisu, agora governu la kompletu, PR kesi tiha governu nia ain, halo nusa, ida ne’e mak situasaun atuál.”
Maske mosu duvida balun ba promesa atu loke kampu serbisu ne’e, maibé deputadu CNRT ne’e afirma, governu bele realiza mehi ne’e bainhira membru governu kompletu.
“Membru governu la kompletu, membru governu na’in sia kedas mak la tama, agora ita atu halo nusa, sira la mai tanba PR laiha razaun hatan sira, ita atu halo nusa, situasaun iha ita-nia rai mak hanesan ne’e, idaidak halo tuir nia hakarak,” dehan deputadu ne’e.
Iha fatin hanesan, deputadu husi Bankada Khunto António Verdial dehan, atu kria kampu serbisu ne’e kompetensia governu nian, nu’udar deputadu nia parte halo de’it fiskalizasaun.
“Atu kria kampu servisu ne’e, kabe ba kompetensia orgaun ezekutivu sira, sira mak tenke halo, sira labele tuur de’it iha office, maibé sira tenke tuun ba kraik hodi identifika serbisu sira ne’ebé hala’o ona no alkansa oinsa, ne’e sira mak haree,” dehan deputadu Verdial.