Vise Xefe Bankada CNRT, deputadu Patrocino Fernandes dos Reis hatete, insidente ne'ebé mosu la fó kulpa ba PNTL maibé kulpa governu nian tanba instituisaun ne'e tutela ba ministériu interiór.

“Ha’u la fó kulpa ne'e tomak ba polísia sira, ida ne'e kulpa no responsabilidade governu ninian, tanba polísia iha governu ninia tutela, governu mak orgaun administrativa ho orgaun ezekutivu ne'ebé halo jestaun ba hotu mós, e iha ministériu ida prórpiu ba polísia ne'e rasik”, dehan nia iha PN, tersa (25/05).

Tanba ne'e, CNRT haree situasaun ne'ebé mosu hahú husi fulan-marsu tinan 2020, bainhira governu deklara estadu emerjénsia to’o agora membru PNTL hanesan umanu mós sente kolen.

“Kuandu ita aplika estadu emerjénsia, polísia sira ne'e moris iha dalan, iha estrada de'it, e até agora sira reklama nafatin katak sira ne'ebé servisu iha postu, sira-nia subsídiu ida ba hanesan front line ninian, dala ruma fulan ida iha, dala ruma fulan tuir mai laiha”, dehan nia.

Maibé, Deputadu bankada FRETILIN, Dario Madeira, konsidera PNTL hatudu atetude hanesan bandalizmu hodi halo torturasaun ba joven sira.

“Hanesan horseik akontese iha João Paulo II ne’eba, semana kotuk akontese iha merkadu Bekora akontese mós iha benkel ne’eba no akontese iha fatin barak atetude PNTL ne’e hanesan fali bandalizmu hanesan kriminozu, hanesan Milisi sira ne’ebé uluk halo torturasaun ba joven barak”, afirma nia. (*)