"Dalaruma regra ho medida (Estadu Emerjénsia) sira ne'e mak halo ita-nia membru PNTL sira sente hanesan baruk atu hein iha ne'ebá, entaun kualker asaun saida mak mosu sira bele uza asaun fíziku hodi hasoru ita-nia populasaun sira”, deklara nia iha plenáriu PN, segunda (24/05).
Ho ida ne'e husu ba governu atu avalia filafali ba medida estadu Emerjénsia kona-bá regra prevensaun covid-19, atu nune'e polísia sira mós labele baruk atu ezekuta medida hirak ne'e.
Mesmu nune'e, pozisaun CNRT mós lamenta tebes, ho atuasaun PNTL nian ne'ebé baku ema tuir sira-nia hakarak.
“Premeiru ha’u haree katak, tuir lolos vendedór ne'e laiha asuntu grave ida ne'ebé mak Oknum PNTL atu bele halo agresaun fíziku grave hanesan vídeo ne'ebé mak viral iha MedSos (media sosial)”, dehan nia.
Iha sorin seluk, Deputadu bankada Partidu Demokrátiku (PD), António da Conseição, husu governu atu hala'o avaliasaun ba medida hotu ne’ebé prevee iha serka sanitária no konfinamentu obrigatóriu, liuliu Estadu Emerjénsia ba prevensaun covid-19.
"Ha’u hanoin ita presiza foti lisaun ruma atu haree avalia filafali medida sira ne'ebé mak ita hola ne'e, atu oinsá mak ita bele jere covid-19”, afirma nia.
Maske iha situasaun serka sanitáiu ne'e ema hotu haree katak prátikamente mosu kontesta barak tebes, maibé PN husu ba governu, sempre dehan de'it buat hotu di’ak.
"Lamentavel tebes, tanba governu prátikamente nonok de'it (en silensio) hodi dehan de'it laiha buat ida ne'ebé mak akontese ho aplikasaun situasaun ida serka sanitária no Konfinamentu Obrigatóriu ne'e”, deklara nia.(*)
