Reprezentante KNBP iha Timor-Leste, Frans Maubere hatete, situasaun polítika nasaun nian ne'ebé povu Papua enfrenta dadauk kontinua aumenta, tanba ne'e husu povu Timor-Leste nian solidaridade.

"Agora situasaun iha Papua ne'eba, maka’as liután, ne'e mak ami husu povu Timor-Leste nia apoiu solidaridade ba Papua, tanba Papua nia luta ne'e mak ami umanidade luta”, hatete nia ba www.tempotimor.com iha rezidénsia FRMU/WP Faról-Dili, Kinta (20/5).

Iha fatin hanesan portavóz Front Rakyat Maubere Untuk West Papua (FRMU/WP), Miguel A. M. da Silva deklara, informasaun husi Papua katak, dadaun ne'e povu iha Papua hasoru hela situasaun difísil, hahú husi loron 25 fulan abril to'o agora. Tanba volume militár husi (Kompi) ida naran pasukan-setan TNI nian aumenta iha Papua hodi halo konflitu oioin no konsege hamate ema na’in ualu iha distritu ida hanaran Laga iha Papua.

"Iha dia 25 abril mai to'o agora, ne'e iha volume militár ne'ebé mak aumenta, husi Kompi ida naran Pasukan-setan TNI ninian, ne'ebé iha prosesu ida ne'e sira kuaze iha konflitu oioin, ne'ebe mak TNI halo, iha distritu (District) Laga, konsege hamate ema sivil na'in ualu, i depois kuaze populasaun husi sub-distritu lima, refujia ba ai-laran”, dehan nia.

Nia mós dehan, la'ós oho de'it, maibé situasaun ne'e konsege hata’uk populasaun kuaze sub-distritu lima mak refújia ba ai-laran, ne’ebé to'o ohin loron seidauk hetan akompañiamentu ka apoiu solidaridade husi nasaun sira iha mundu, inklui Organizasaun Noun Govermentál (ONG) nomós Palamera Internasionál.

Fontes ne’e subliña, informasaun refere la sai ba públiku liliu ba mundu atu haree, tanba kuaze liña internet iha Papua ne'e (down) ka sira hamenus tiha kapasidade liña internet nian, entaun difikulta média sira iha Papua atu explora kualker situasaun ida ne'e sai ba públiku.

"E depois iha semana hirak liubá, portavóz internasionál Victor Yeimo, KNPB nian kapturadu iha sidade Jayapura”, hatete nia.

Ho situasaun hirak ne'e maka organizasaun FRMU/WP ezije ba governu Indonézia liliu embaixada Indonézia iha Timor-Leste, atu normaliza kualker prizineiru, polítiku ne'ebé mosu iha Papua ka husi provísiu sira seluk nomós dada fila militár iha Papua.

"Ita haree katak ne'e problema polítika entaun nia tenke iha mós liuhusi solusaun polítiku katak prosesu polítiku la presiza to'o intervensaun ne'ebé mak tenke ser halo povu barak terus iha situasaun ida ne'e”, afirma nia.(*)