Prezidente Komisaun B, deputadu José Agustinho Siqueira ‘Somotxo’, esplika proposta-lei númeru 21/V(2a) prosesu primeira alterasaun ba lei númeru 3/2010, 21 abríl kona-ba Lei Defeza Nasionál, dadaun artigu haat konsege finaliza ona iha debate espesialidade maibé hela artigu 8 mak seidauk.
“Primeira alterasaun ba lei defeza nasional ne'e, halo alterasaun ba artigu 12, maibé ohin (18/05) ami iha ona ba artigu haat, (14, 17, 18, ho 20), ohin vota hotu ona, ne'e mak ami sai mai ba almosu orsida lokraik tuku 2 otl, sei mai fila diskute ho vota ba restu ne'ebé sei hela 8 artigu”, hatete nia iha PN, tersa (18/05).
Enkuantu, Governu liuhosi Ministériu Defeza propoin ba Parlamentu Nasionál husu altera artigu hamutuk 12 kompostu artigu 14, 17, 18, 20, 29, 31, 32, 33, 34, 35, 36 no 57 iha lei refere. Governu aprezenta proposta-alterasaun ne’e bazea ba Konstituisaun RDTL artigu 97 no artigu 115.
Ho alterasaun ne’e atu armoniza ho dokumentu konjuntu sentrál iha definisaun polítika defeza nasionál no formulasaun asaun estratéjiku militár estadu nian, dezignadamente konseitu estratéjiku defeza no seguransa nasionál, konseitu estratéjiku militár, sistema forsa nasionál, misaun forsa armada no dispozitivu iha F-FDTL. (*)