Tanba informasaun ne’ebé espalla iha mídia sosial, katak sidadaun Timor-Leste piñor nia oan hodi aluga uma kost, ho folin fulan ida US$35.
Tuir lolos, kestaun Inan ka aman ne’ebé piñor nia oan, ida ne'e labele akontese tanba krime.
Bainhira identifika kazu ne'e los duni, mak sei lori ba prosesu justisa, tanba ema ne’ebé piñor nia oan, inklui ema simu piñor ne'e komete krime.
"Ha’u sei husu ba governu ho Ministru Interior (MI) no ba PNTL atu investiga, los ka la'e. Se los ne'e tenke prosesa, se lalos mós tenke deklara”, afirma Aniceto iha plenária PN, segunda (17/05).
Iha fatin hanesan Xefe Bankada KHUNTO, Olinda Guteres deklara, nia parte la fiar, tanba laiha lojika kuandu sidadaun ida lori fali nia oan mak hodi halo piñor atu uza selu kost.
Ho ida ne'e husu ba mídia nasional no privadu atu kuidadu no labele hato'o liafuan ne’ebé la justu ba públiku.
"Ha’u la fiar ke ema ida lori nia oan ba piñor fali nia ba ema atu aluga uma fulan ida US$35, lojika ne'e iha ne'ebé. Mídia kuidadu didi’ak ita-boot sira-nia liafuan, tenke hato'o liafuan ne’ebé mak justu ba ema hotu hodi kontente”, hatete nia iha Plenária PN, segunda (17/05).
Pozisaun KHUNTO la fiar tanba sidadaun ne'e iha ona oan, siknifika sidadaun ne'e moris iha 1975, no tinan boot ona, entaun toman ona Indonézia nia ukun, hatene buka osan.
"Ha’u rasik la fiar dehan katak ema ida ho 35 dólar hodi nia oan piñor, ha’u la fiar, tanba ha’u moris, tinan naruk ona, iha malae mutin nia tempu ami seidauk lolo liman ba malae mutin, 1975 ami la'o iha ailaran ami seidauk lolo liman ba ema ida, ne'e senór Taur Matan Ruak iha momentu ne'eba kaer ukun ai-laran ninian, be ami seidauk tane liman, Indonézia nia tempu mós ami seidauk tane liman”, afirma nia.
Ho ida ne'e KHUNTO konsidera kestaun ida ne'e hanesan polítika de'it, tanba agora Timor-Leste ukun-an ona, timoroan sira labele buka ai-han ida atu sustenta nesesidade.
"Ema ne'ebe laiha oan nia buka oan, agora ita ba fa’an fali ita-nia oan, ne'e la lójika, ne'e polítika, para hamoe governu, maibé governu ida ne'e sei la nakdoko”, hatete nia. (*)
