“Husu ba Governu atu asegura protesaun ba pesoál saúde sira, adopta medida ne'ebé efikas kona-bá sensibilizasaun públika ba prevene Covid-19”, dehan nia iha PN, sesta (14/05).

Pozisaun Parlamentu Nasional louva teb-tebes pesoál saúde hothotu maske sira hala'o kna’ar ne’ebé todan no hasoru violénsia oioin, maibé kontinua hala'o servisu ho responsabilidade.

Lamenta teb-tebes ho tratamentu, atitude no liafuan violentu sira ne'ebé sidadaun balun halo hasoru pesoál saúde sira, wainhira hala'o kna'ar, atende pasiénte covid-19.

"Parlamentu Nasional rekoñese, hatudu apoiu inkondisional no louva pesoál saúde sira-nia korajen, dedikasaun, abnegasaun no dezempeñu profisionál”, afirma nia.

Ne'e duni husu sidadaun hotu atu mantein firme iha kumprimentu regra prevensaun no mitigasaun pandemia ne'e ho konsiénsia rasik iha ida-idak nia fatin, respeita no kolabora ho pesoál sira ne'ebé halo servisu prevensaun no mitigasaun? hato'o informasaun ne’ebé di'ak no loloós ba malu.

"Moras ne'e no dezastre naturál la hili se mak atu sai vítima, maibé wainhira hasoru se de'it, nia mak sei sai vítima”, dehan nia. (*)