Tempotimor (Dili)-Primeiru Ministru (PM), Taur Matan Ruak, hato’o votu felisitasaun ba jornalista sira iha mundu liuhusi selebrasaun loron liberdade imprensa, ne’ebé selebra iha loron ohin, (03 fulan-maiu).

Haree ba loron 3 fulan-maiu, nu’udar loron espesial ba jornálista sira, tanba loron ne’ebé Nasaun Unida adopta hanesan Loron Mundiál Liberdade Imprensa hodi fó hanoin ba nasaun hotu iha mundu tomak atu respeita Liberdade Imprensa.

“Ha’u lori Governu nia naran, hakarak hatao’o votu felisitasaun ba jornalista sira iha mundu tomak no espesialmente ba jornalista timoroan sira hotu ba imi-nia loron espesial ohin", deklara Taur liu husi komúnikadu impresnsa ne'ebé www tempotimor.com asesu iha loron, segunda (03/05).

Tuir índise liberdade imprensa mundiál nian ba tinan 2021 husi Report Without Borders (RSF) hatudu Timor-Leste iha pozisaun 71 ho pontuasaun global 29.11 husi totál nasaun 180 ne’ebé RSF rekolla.

Tanba ne’e, hatudu Timor-Leste iha nível di’ak liu kompara ho nasaun sira iha sudeste Áziatiku inklui mós nasaun balun ne’ebé ukun-an iha tinan barak ona.

“Ita kompara ho país balun ne’ebé ukun-an kleur ona, mais sira-nia Liberdade Imprensa sei dook liu husi ita-nian, no hatudu katak Liberdade Imprensa iha ita-nia nasaun, nia iha fatin. Hanesan Primeiru Ministru, ha’u orgullu, no ita hotu tenke orgullu ba prestasaun ida ne’e”, afirma Taur.

Xefe Governu dehan, governu respeita tebes Liberdade Imprensa, no iha vontade atu kontinua apoiu insitiuisaun mídia sira hodi kontinua hala’o sira-nia kna’ar ho independente, imparsialidade, respeitu kode etika jornálista no responsabilidade nu’udar pilar impórtante ba demokrasia.

Maske, Timor-Leste hasoru hela obstaklu boot dezastre naturál ne'ebé akontese iha loron 4 fulan-abril, no Pandemia COVID-19.

Nune'e, Governu halo esforsu oinsá atu minimza impaktu husi kalamidade ne’e. Maibé iha situasaun sira hanesan ne’e, jornálista sira-nia kontribuisaun oinsá tulun Estádu iha divulgasaun informasaun ne'ebé loos, justu, kredivel no mais edukativu atubele ajuda Estadu iha situasaun ne’e.

Ho situasaun ne'e, la haluha mós agradese ba Jornálista sira nia kontirbisaun durante ne’e hato’o informasaun ba públiku relativa ho atividade sira Governu nian, maske hasoru difikuldades oioin iha terenu, maibé nafatin iha vontade. (*)